AQSh-tyń áskerı-teńiz kúshteri súńgýir qaıyqtarda paıdalaný úshin gıpersonııalyq zymyrandardy tezirek alǵysy keledi, dep habarlaıdy Egemen.kz.
Bul týraly AQSh Áskerı-teńiz kúshteriniń strategııalyq júıeler baǵdarlamalarynyń jetekshisi, vıse-admıral Djonnı Výlf málimdedi. Ol sonymen birge flottyń gıpersonııalyq jabdyqtaryna jaýap beredi.
Výlf málimdegendeı, amerıkandyq áskerı-teńiz kúshterinde súńgýir qaıyqtardan ushyrylǵan gıpersonııalyq zymyrandardy qoldaný 2025-2028 jyldarǵa shegerilgen bolatyn. Sonyń ishinde sý astyndaǵy synaq jabdyqtaryna baılanysty qarjylandyrý ýaqytsha toqtaǵan. AQSh flotynyń gıpersonııalyq zymyrandardy alýǵa degen umtylysynyń bir sebebi, QHR-dyń osy saladaǵy múmkindikteriniń artýy bolyp otyr.
«Biz olardy 2023 jyly Qurlyq áskerlerine ornalastyrmaqpyz. Sondaı-aq 2025 jyly zumwalt joıǵyshyna paıdalanýǵa tıistimiz. Sodan keıin 2028 jyly zymyrandardy «Vırdjınııa» klasynyń súńgýir qaıyqtary úshin alamyz», dedi Výlf.
Budan bólek, «sırkon» gıpersonııalyq zymyrandaryn Reseı áskerı-teńiz kúshterine serııalyq jetkizý 2022 jyly bastalady dep kútilýde. Sońǵy ret Reseı Qorǵanys Mınıstrligi olardyń synaqtary týraly 18 qarasha kúni habarlaǵan edi. Soltústik flottyń fregaty Aq teńizde ornalasqan teńiz nysanasyna taǵy bir oq jaýdyrdy jáne ony tikeleı soqqymen dóp tıgizdi. Bul másele de AQSh-tyń uıqysyn qashyrǵany ras.
О́tken jyldan bastap Reseı «sırkon» zymyrandaryn synaqtan ótkizdi. Jalpy, Qorǵanys mınıstrliginiń resmı málimetteri boıynsha, keme bes ret jańa zymyrandardy atqan.
«Sırkon» - álemdegi alǵashqy áleýeti óte zor gıpersonııalyq zymyran. Ol óziniń qozǵaltqyshynyń tartylýyn paıdalanyp jáne atmosferada manevr jasaı otyryp, uzaqqa ushýǵa qabiletti. Onyń maksımaldy jyldamdyǵy toǵyz dybys jyldamdyǵyna jetedi, maksımaldy atys dıapazony – 1 myń shaqyrym. «Sırkon» jer ústindegi jáne sý astyndaǵy nysandardy joıýǵa baǵyttalǵan qarý.