Petropavl qalasynyń áýejaıynda jeke málimetterdi rastaý úshin «e-Gov Mobile» qosymshasy arqyly sıfrlyq jeke kýálikti qoldaný múmkindigi paıda boldy, dep habarlaıdy Egemen.kz.
Buǵan deıin mundaı qyzmet Nur-Sultan, Almaty, Aqtóbe, Shymkent, Túrkistan, Aqtaý, Atyraý jáne Taraz qalalarynda iske qosylǵan bolatyn.
Áýejaıda sıfrlyq jeke kýálikti paıdalaný úshin eGov mobile júıesinde avtorlanǵan azamat «Sıfrlyq qujattar» servısine kirip, tizimnen óziniń jeke kýáligin tańdaýy tıis. Áýejaıdaǵy tirkeý ornynda, sondaı-aq ushý aldyndaǵy tekserýden ótý kezinde smartfon ekranynan servıstegi QR-kodty kórsetý kerek.
«Sıfrlyq jeke kýálikti el ishindegi reısterde paıdalaný múmkindigin qamtamasyz etý úshin Indýstrııa jáne ınfraqurylymdyq damý mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrligi, «Qazaqstannyń avıasııalyq ákimshiligi» AQ, Qazaqstan Respýblıkasynyń avıakompanııalary men áýejaılary jáne «Ulttyq aqparattyq tehnologııalar» AQ júıelerin ıntegrasııalaý boıynsha birlese jumys atqardy.
Sıfrlyq qujattar servısi pılottyq tártipte iske qosyldy jáne bul múmkindik ázirshe Nur-Sultan, Almaty, Aqtóbe, Shymkent, Túrkistan, Aqtaý, Atyraý, Taraz jáne Petropavl qalalarynyń arasyndaǵy reısterde ǵana qoljetimdi. Pılottyq joba bolǵandyqtan, bul servısti qoldanýdy josparlaǵan jolaýshylar ózimen birge jeke kýáliginiń túpnusqasyn da alǵany jón», delingen IIDM habarlamasynda.