Kez kelgen ultty qalyptastyratyn orta – onyń ulttyq bilim ordasy. Sondyqtan qazaq mektebiniń taǵdyry – el taǵdyry. Ultymyzdyń bolashaǵyn oılaǵan alashtyń ardaqtylary muny árqashan eskerip otyrǵan. Qazaq halqynyń uly perzenti Mustafa Shoqaı «Ulttyń mádenıetten jurdaı rýhpen tárbıelengen urpaqtan halqymyzdyń qajeti men múddesin jaqtaıtyn paıdaly azamat shyqpaıdy» dep, ult bolashaǵyn ulttyq bilim berý ordasynda, ulttyq rýhta tárbıeleý kerektigin basa aıtqan.
Táýelsizdikke 30 jyl tolýyna oraı bilim ordasynyń belsendi jetekshileri 5 «A» synyp jetekshisi Dınara Beısenbınovna men 6 «J» synyp jetekshisi Merýert Erkinbekqyzy synyby jáne ata-analarmen birlesken jumys tóńireginde «biz jas urpaq ˗ tabıǵat qorǵany» degen urandy ustana otyryp taǵylymdyq, tárbıelik máni zor is-sharany júzege asyrdy. Negizgi maqsat – kórikti jerdi kópshilikke tanystyrý, adamnyń boıyna qýat, kóńiline shabyt, sezimine lázzat shapaǵatyn uıalatatyn sulýlyq pen ásemdik álemin urpaq ıgiligine jaratý. Týǵan jerdiń taǵdyryna tolǵanatyn, jany tebirenip sol týraly oılaıtyn urpaq tárbıeleý jolynda Máshhúr Júsip atyndaǵy №57 orta mekteptiń bilim alýshylary synyp jetekshilerimen birge Býrabaı tabıǵatyn tamashalaýǵa jol tartty.
Aqmola oblysyna qarasty Shortandy qalasynan 20 shaqyrymdaı qashyqtyqtaǵy Býrabaı kóliniń jaǵasynda Abylaı alańy, Oqjetpes, Býrabaı kenti, Býrabaı qorymy, Jeke batyr tarıhı-mádenı oryndarymen oqýshylar keńinen tanysty jáne árbir tarıhı ańyzdyń ataýy men tylsym tabıǵattyń tirshiligi, máńgi tozbas qutty meken qonys bolatyny týraly tereń maǵlumat aldy. Ásirese, «Abylaı alańy» oqýshylardyń nazaryn ózderine qatty aýdardy. Úsh júzdiń basyn qosyp, el erteńi úshin keleli keńester men mańyzdy sheshim qabyldaǵan han taǵyn, ornalasqan jerdi kórý oqýshylarǵa qatty áser qaldyrdy. Oqýshylar «Qansha ǵasyr ótken el bıleýshisiniń taǵy áli saqtalǵan ba?» degen suraqtar qoıyp jatty.
Tabıǵatqa meıirimdilikpen, súıispenshilikpen, qamqorlyqpen qarap, úılesimdilik saqtaǵanda, adamzat balasy úshin tabıǵat keń saraı ekeni aıtyldy. Jalpy, tirshilik ataýlynyń barlyǵy Jer-anaǵa, tabıǵatqa qaryzdar ekeni bolashaq urpaqtyń sanasyna bekı tústi. Sondyqtan da tabıǵatqa nemquraıly qaraý, onymen sanaspaý – ana sútin aqtamaǵanmen para-par. Kózimen kórip, qolymen ustaǵan urpaqtyń sezimine selk etkizer shókimdeı oı tastap, oılantý synyp jetekshilerdiń basty maqsaty bolatyn. Shynynda da aıaly tabıǵatty aıalaıtyn urpaqty kórý – maqtanysh.
Adam balasy tabıǵattyń eń uly perzenti bolýmen birge, eń uly qamqorshysy da ekenin eshqashan esten shyǵarmaýymyz kerek.
Gýlfaırýz DÁÝLETOVA,
Nur-Sultan qalasyndaǵy
Máshhúr Júsip atyndaǵy №57 orta
mekteptiń qazaq tili men ádebıeti
pániniń muǵalimi