Qalanyń bas sanıtarlyq dárigeriniń málimetinshe, búginde halyqty vaksınanyń birinshi komponentimen qamtý 65,6% jáne eki komponentimen qamtý 61,4% qurady, dep jazady Egemen.kz.
Búgingi tańda Nur-Sultanda vaksınanyń birinshi komponentin 476 myńnan astam azamat aldy, 438 myń turǵyn ımmýndaýdyń tolyq kýrsynan ótti.
Ákimdikte ótken brıfıngte elordanyń qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva habarlaǵandaı, vaksınasııa pýnkteri 36-dan astam medısınalyq uıymdarda jáne qalanyń 4 saýda kesheninde ornalasqan: «Kerýen» SOO, «Abý-Dabı Plaza», «Azııa park» jáne «Evrazııa» saýda úıleri.
«Azamattardy vaksınasııalaýǵa 300-den astam medısına qyzmetkeri jumyldyryldy. 15 qarashadan bastap elorda Pfizer preparatymen júkti jáne bala emizetin áıelderdi, 12-18 jas aralyǵyndaǵy jasóspirimderdi vaksınasııalaýǵa kiristi. Tolyq úsh apta ishinde osy vaksınamen tıisti kontıngentten 9 300 adam vaksınasııalandy. Pfizer alý boıynsha kóshbasshy bolyp turǵan jasóspirimder - 6 200 – den astam bala, odan keıin bala emizetin analar - 2 800-den astam jáne júkti áıelder-206 adam. Jasóspirimder ekpeni medısınalyq uıymdarda da, óz mektepteriniń medısınalyq pýnktterinde de ala alady», dep habarlady Gúlnaz Dosmyrzaeva.
Sonymen qatar 22 qarashadan bastap búkil el boıynsha azamattardyń koronavırýstyq ınfeksııaǵa qarsy revaksınasııasy bastaldy. Búgingi tańda elordada medısınalyq qyzmetkerler, pedagogter, kúsh qurylymdarynyń qyzmetkerleri, 60 jastan asqan jáne ımmýnıteti tómen adamdar, medısınalyq-áleýmettik mekemelerdiń personaly men kontıngentinen 2 100-ge jýyq adam KVI-ge qarsy qaıtalama vaksına aldy.
«Revaksınasııa sanıtarlyq normalar men komponentter arasyndaǵy aralyqty qatań saqtaı otyryp júrgiziletinin atap ótkim keledi. Vaksınany qaıtadan medısınalyq uıymdardyń jáne SOO, t.b. vaksınalaý pýnkterinen alýǵa bolady. Qyzyl aımaqqa oralmas úshin karantın rejımi týraly umytpaý kerek. Sonymen qatar vırýstyń mýtasııasyn eskere otyryp, ımmýnıtetti ınfeksııadan múmkindiginshe tezirek qorǵaý qajet. Buǵan tek vaksınasııa kómektesedi», dedi qalalyq Densaýlyq saqtaý basqarmasy basshysynyń orynbasary.