Nur-Sultan qalasynyń bas memlekettik sanıtar dárigeri Sarhat Beısenova elordadaǵy koronavırýstyń «omıkron» shtamyn anyqtaý jumystary jóninde aıtty, dep habarlaıdy Egemen.kz.
«Eki aıda bir ret qalanyń epıdemıologııalyq qyzmeti, búkil respýblıka sekildi qandaı vırýs basym ekenin baqylaý úshin koronavırýs ınfeksııasynyń shtamdaryn anyqtaý jáne zertteý boıynsha monıtorıng júrgizedi», dedi S. Beısenova elorda ákimdiginde ótken brıfıngte.
Onyń aıtýynsha, qazirgi ýaqytta PTR-synamalardyń birqatary zertteý satysynda tur.
«Qazirgi ýaqytta «omıkron» álemniń kóptegen elderinde taralǵandyqtan, biz Densaýlyq saqtaý mınıstrligi men sanepıdbaqylaý komıtetinen oń PTR-zertteý synamalaryn sekvındeý úshin zerthanaǵa jetkizý týraly tapsyrma aldyq. Búgingi tańda biz materıaldy Saraptama ortalyǵy zerthanasynyń Nur-Sultandaǵy fılıalyna jetkizdik. Iаǵnı, qazir 35 synama zertteý satysynda tur. Sonyń nátıjesinde biz elordada jáne jalpy respýblıka boıynsha «omıkron» aınalymy bar-joǵyn aıta alamyz. Bul jumys jalǵasyp jatyr», dedi S. Beısenova.