Keýdesinde jany bar árbir adamnyń armany bar. Eger ol armandardy oryndaý adamnyń qolynda bolsa, onda nege tilekterine óz betinshe jete almaıtyn muqtaj jandar men kishkentaılardyń alǵys-saýabyna bólenbeske?!
Aldymen «Tilekter aǵashy» qaıyrymdylyq aksııasy Qazaqstanda 2014 jyldan beri ótkizilip júrgenin, jyl saıyn balalardyń tilekteri kóbeıip kele jatqanyn aıta ketý kerek. Eń bastysy, kómektesýge nıet bildirýshilerdiń de sany da ósip kele jatqany qýantady.
Sonymen 3 jeltoqsanda Charity Wish Tree qoǵamdyq qory Qazaqstannyń 4 qalasynda «Tilekter aǵashy» qaıyrymdylyq aksııasyn iske qosty. Bul sharanyń basty maqsaty – muqtaj otbasylardan shyqqan balalardyń jańa jyldyq tilekterin oryndaý, jańa jyl qarsańynda adamdarǵa bir túıir bolsa da jaqsylyq syılaý.
Qaıyrymdylyq aksııasyna kópbalaly, az qamtylǵan, patronat otbasylar, jalǵyzilikti otbasylar, sondaı-aq múmkindigi shekteýli balalardy tárbıelep otyrǵan jandar qatysyp jatyr. Aksııa 16 jasqa deıingi balalardy qamtıdy, al damýynda kináraty bar balalar úshin jas shekteýleri joq.
Joba bıyl Qazaqstannyń tórt qalasy Almaty, Nur-Sultan, Shymkent jáne Qaraǵandyda iske asyrylady.
– Balalardyń qalaýy ártúrli – bul tek mashına, qýyrshaq nemese basqa zattar da emes. Tilek armanmen baılanysty bolýy da múmkin. Mysaly, Vıktorııa esimdi balalar úıiniń tárbıelenýshisi stıýardessa bolýdy armandady, bul týraly bizge jazyp, keıin onyń tilegi oryndaldy – ótken jyly ol formasyn kıip, naǵyz bortserikterdiń qamqorlyǵymen osy mamandyqtyń ishki ashanasyn kóre aldy. Balalarǵa mereke syılaǵysy keletin kez kelgen adam ózi oryndaı alatyn jáne jaǵymdy emosııalar týdyratyn tilekti tańdaı alady, – deıdi jobanyń negizin qalaǵan Dıana Kamaladın.
Aıtqandaı, jobaǵa qatysýshylar az qamtylǵan, erekshe balalary bar otbasylary, «Men senimen birgemin» hospısi, SOS balalar aýyly balalarynyń armandaryn oryndaı alady.
«Qazir biz balalardyń materıaldyq emes tilekterine nazar aýdaramyz, biz balanyń armanyn oryndaǵymyz keledi, mundaı balalarǵa shattyq syılaıtyn kóńil-kúı balalardyń damýyna oń yqpal etedi. Bıyl bizde akvaparkke saıahat, taýǵa shyǵý, BAO-ǵa saıahat sııaqty erekshe tilekter bar», deıdi Dıana.
Uıymdastyrýshylardyń aıtýynsha, kóp uzamaı joba óz qosymshasyn iske qosady, bul jobany onlaın rejiminde tasymaldaýǵa múmkindik beredi.
Almatydaǵy aksııa «Mega» oıyn-saýyq, saýda ortalyǵynda bastaldy. Saýapqa bólengisi keletinder tilek-hattardy aǵashtan 3 jeltoqsannan bastap 12 jeltoqsanǵa deıin «julyp» alýǵa bolady.
ALMATY