Búgin QR Tuńǵysh Prezıdenti – Elbasy kitaphanasynda Gánjaýı laqap atymen tanylǵan ázerbaıjan halqynyń uly aqyn-fılosofy Ilııas ıbn Júsip Nızamıdiń 880 jyldyǵyna arnalǵan «Nızamı Gánjaýı» art-albomynyń tanystyrylymy ótti, dep habarlaıdy Egemen.kz.
Tusaýy kesilgen art-albomnyń quramyna Nızamı shyǵarmalarynyń negizinde jaryq kórgen tanymal sýretshilerdiń 100-den astam jumysy engen.
Is-sharany Elbasy kitaphanasynyń dırektory Baqytjan Temirbolat ashty.
«Qazaqstannyń Tuńǵysh Prezıdenti Nursultan Ábishuly Nazarbaev «Uly dalanyń jeti qyry» maqalasynda «Tól tarıhyn biletin, baǵalaıtyn jáne maqtan etetin halyqtyń bolashaǵy zor» dep atap kórsetken bolatyn. Elbasy kitaphanasy TÚRKSOI uıymynyń túrki áleminiń uly oıshyly Nızamı Gıandjavıdiń kórkem albomyn tanystyrý jónindegi bastamasyn qoldady. Bul eńbektiń túrki halyqtarynyń ǵana emes, álem órkenıetiniń tarıhyna, ǵylymy men mádenı murasyna eleýli úles qosatynyna senimdimin», dedi ol óz sózinde.
Ázerbaıjan Respýblıkasynyń Qazaqstan Respýblıkasyndaǵy Tótenshe jáne О́kiletti Elshisi Aǵalar Atamoǵlanov Nızamı Gánjaýı muralarynyń qundylyǵyna toqtala ketti.
«Sabyr túbin sary altyn sanaǵan Nızamı Gánjaýı ómir synaǵyna tap bolǵandarǵa taǵylym bolatynyn bilgen. Tózimdilik – shatasqan túıindi sheshetin qasıet... Eńbek etkendi qara jer de qur qaldyrmaıtynyn jetkizýge tyrysqan Nızamıdiń qazaq tarıhy men mádenıetimen baılanysy tyǵyz. Uly oıshyldyń shyǵarmashylyǵy qazaq ádebıetinde jyl saıyn kóbeıip keletini bizdi qýantady», dedi ol.
Aıta ketsek, «Nızamı Gánjaýı» art-albomyn qurý ıdeıasynyń avtory – TÚRKSOI bas hatshysy Dúısen Qaseıinov.
«Albomǵa engen ár sýrettiń ózindik tarıhy bar. Basylymnyń oqyrmany múmkindiginshe kóp bolsyn dep, albomdy aǵylshyn tilinde jaryqqa shyǵardyq. Mundaı mańyzdy kitaptardy biz serııamen basýdy uıǵardyq. Olardyń qatarynda Abaı Qunanbaıuly, Oljas Súleımenov, Shyńǵys Aıtmatov syndy uly tulǵalarǵa arnalǵan eńbekter bar. Búginde Álisher Naýaı, Maqtymquly Dáýletmámedulyna arnalǵan albomdar ázirlený ústinde. TÚRKSOI túrki álemindegi kórnekti tulǵalardyń murasyn jańǵyrtýdy kózdeıdi», dedi Dúısen Qaseıinov.
Issharaǵa TÚRKSOI uıymynyń ókilderi, Qazaqstannyń memleket jáne qoǵam qaıratkerleri, dıplomattar men ǵalymdar, sondaı-aq BAQ ókilderi qatysty.