Atyraý oblystyq sotynyń baspasóz qyzmeti Baqytgúl Hamenovany eki aıǵa qamaýǵa alý sheshimin túsindirdi, dep habarlaıdy Egemen.kz.
Prokýror ótinishi boıynsha Atyraý oblystyq sotynyń Qylmystyq ister jónindegi sot alqasy Atyraý qalalyq mamandandyrylǵan tergeý sotynyń 12 jeltoqsandaǵy oblys ákiminiń orynbasary Baqytgúl Hamenovany úıqamaqqa alý týraly sheshimi kúshin joıdy. Jańa qaýly boıynsha, Hamenova eki aıǵa qamaýǵa alyndy.
«Sot alqasy Hamenovanyń sanksııasy boıynsha jeti jyldan 12 jylǵa deıin bas bostandyǵynan aıyrý jazasy qarastyrylǵan asa aýyr sybaılas jemqorlyq quqyqbuzýshylyq (QK-nyń 366-baby 3-bóliginiń 2-tarmaǵy) jasady degen kúdikke ilingenin eskerdi. Bul proseske qatysýshylarǵa jáne isti obektıv tergep-tekserýge qysym kórsetýi múmkin», dedi sottyń baspasóz qyzmeti ókilderi.
Buǵan deıin iri kólemde para aldy degen kúdikpen úıqamaqqa alynǵan Atyraý oblysy ákiminiń orynbasary Baqytgúl Hamenova tutqyndalyp, eki aıǵa ýaqytsha ustaý ızolıatoryna qamalǵany habarlanǵan bolatyn.