Nur-Sultan jáne Almatyda Qarjylyq monıtorıng agenttigi Ulttyq qaýipsizdik komıtetimen birlesip, arnaıy operasııa júrgizdi. Operasııa nátıjesinde esirtki zattaryn Qazaqstan aýmaǵyna ótkizýmen aınalysqandardyń joly kesildi, dep habarlaıdy Egemen.kz Qarjylyq monıtorıng agenttiginiń baspasóz qyzmetine silteme jasap.
Agenttik málimetinshe, esirtki zattary halyqaralyq arnalar arqyly jaqyn shet elderden halyq tutynatyn ártúrli taýarlar túrinde jetkizildi.
«Shaǵyn mólsherde ólshep oralǵan esirtki zattary Nur-Sultan jáne Almaty qalalarynyń saıabaqtary, mektepteri, aýrýhana, mektepke deıingi mekemeler aýmaǵynda taratylǵan», delingen habarlamada.
Satý anonım Telegram-arnalar arqyly júrgizildi, tólem Qiwi-koshelek elektron tólemder arqyly qabyldandy. Negizgi satyp alýshylar Qazaqstannyń kámeletke tolmaǵan azamattary boldy.
«Esirtki satýshylar úı janýarlaryna arnalǵan azyq túrinde oralǵan kezekti halyqaralyq taýardy alý kezinde ustaldy. Ustalǵandardyń turatyn jerlerin tintý kezinde sıntetıkalyq esirtki zaty - mefedron, marıhýana, býyp-túıý materıaldary, tarazy tabyldy. Tárkilengen esirtkiniń jalpy salmaǵy 7 kılogramnan astam marıhýana men mefedrondy qurady», dep habaralady baspasóz qyzmeti ókilderi.
QR QK-nyń 286-baby 2-bóligi jáne 297-baby 3-bóligi boıynsha qylmystyq is qozǵaldy. Esirtki saqtaǵany jáne satqany úshin bes qylmysker ustaldy.
Ustalǵandar tergeý ızolıatoryna 2 aı merzimge qamaýǵa alyndy, tergeý amaldary júrgizilip jatyr.