Qazaqstannyń birden 34 ýnıversıteti brıtandyq QS EECA 2022 agenttiginiń nusqasy boıynsha úzdik joǵary oqý oryndarynyń tizimine endi, dep habarlaıdy Egemen.kz.
Reıtıng Eýropa men Orta Azııa elderiniń úzdik joǵary oqý oryndary týraly aqparatty qamtıdy. TOP-100 quramyna 7 otandyq ýnıversıtet kirdi. Kóshbasshy ál-Farabı atyndaǵy Qazaq ulttyq ýnıversıteti boldy. О́tken jylmen salystyrǵanda ýnıversıtet 3 pozısııaǵa joǵarylap, reıtıngte Stambýl tehnıkalyq ýnıversıteti (Túrkııa), Vılnıýs ýnıversıteti (Lıtva) jáne basqa da sheteldik ýnıversıtetterdi basyp ozyp, 16-orynǵa ıe boldy.
QazUÝ-dan keıin reıtıngte L. N. Gýmılev atyndaǵy Eýrazııa ulttyq ýnıversıteti kósh bastap tur. Ol halyqaralyq reıtıngtte 42-shi ornynǵa jaıǵasty. Qazaqstandyq joǵary oqý oryndary arasynda Satbayev University úshinshi orynda tur. О́ńirlik joǵary oqý oryndary arasynda TOP-100 qataryna M. Áýezov atyndaǵy Ońtústik Qazaqstan ýnıversıteti endi.
«QS Emerging Europe and Central Asia University Rankings reıtıngine kiretin qazaqstandyq joǵary oqý oryndarynyń sany jyl saıyn artyp keledi. Bul joǵary bilimniń álemdik arenada tanylýyn bildiredi. Eger ótken jyly reıtıngke 27 qazaqstandyq ýnıversıtet kirse, bıyl 34 joǵary oqý oryny endi. Otandyq ýnıversıtetter Reseı, Chehııa, Polsha, Estonııa, Lıtva, Túrkııa, Grýzııa, Ázirbaıjan jáne basqa elderdiń jetekshi ýnıversıtetterimen básekege túsýde. Bul bizdiń joǵary oqý oryndarynyń bilim berý sapasyn arttyrý boıynsha úlken jumys júrgizilgenin kórsetedi.
Sondaı-aq álemdik reıtıngtegi qazaqstandyq ýnıversıtetterdiń sanynyń artýy bizdiń joǵary oqý oryndarymyzdyń zaman talaptaryna jáne álemdik standarttarǵa saı bilim beretindigin kórsetedi», dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Aıta keteıik, QS EECA reıtıngin jasaý kezinde on negizgi kórsetkish eskeriledi. Olardyń ishinde ýnıversıtetterdiń jumys berýshiler arasyndaǵy jáne akademııalyq bedeli, oqytýshylar men stýdentter sanynyń araqatynasy, bir oqytýshy men qyzmetkerge shaqqandaǵy jarııalanymdar sany, joǵary oqý oryndarynyń ǵalymdarynan dáıeksóz alý sany, sheteldik stýdentterdiń, oqytýshylar men qyzmetkerlerdiń úlesi jáne taǵy basqalary bar.