Taıaýda Shortandy kentinde oryn alǵan jarylystan zardap shekken otbasyna qarjylaı kómek kórsetilip, jetim qalǵan tórt balaǵa Nur-Sultan qalasynan páter áperildi.
Sońǵy jyldary el ishinde izgilik sharapaty mol «El úlesi – páterge» bastamasy qyrýar jumys tyndyrýda. Tirshilik bolǵan soń aıtyp kelmeıtin apattyń oryn alatyny da bar. Mine, osyndaı sátte qıyndyq qursaýynda qalǵan adamdar izgi qoǵamnyń izetti isimen kóńil jadyratsa, demeý kórse, jan jarasy jazyla túser edi.
Shortandydaǵy jarylystan soń qapııada qaıǵy shekken azamatqa qarjylaı kómek berýshiler óte kóp boldy. Bul jaı bizdiń qoǵamnyń janashyrlyǵyn, baýyrmaldyǵyn kórsetedi.
– О́ńirde jıyrmaǵa jýyq otbasy osy bastama aıasynda qolǵa alynǵan jumystyń nátıjesinde baspanaly boldy, – deıdi oblystyń bas ımamy Qýanysh qajy Jumabaıuly, – biz Shortandydaǵy shetin oqıǵa týraly estigen kezde qatty ýaıymdadyq. «Tas túsken jerine aýyr» demekshi, oılamaǵan jerden oryn alǵan oqys oqıǵanyń sonshalyqty zilmaýyr ekendigin jan júregimizben sezindik. Ile qarajat jınap, kómektesý týraly bastama kóterdik. Halyqqa rahmet, az ýaqyttyń ishinde 14 mln-nan astam aqsha jınaldy. Kómek qolyn sozǵandar arasynda el aqsaqaldary men jastar da bar.
Igi sharanyń taǵy bir tıimdi tusy – óskeleń urpaqqa ómirsheń ónege bolatyndyǵynda. Ilki zamannan beri bir-birine qolushyn berýdi paryz sanaǵan parasatty qaýymnyń osyndaı ordaly isinen úlgi alyp ósse, birliktiń tamyry bekem bola túsetini taǵy bar.
Aqmola oblysy