Shymkent qalasynyń ákimi M.Áıtenovtiń tóraǵalyǵymen ınvestısııalyq shtabtyń kezekti otyrysy ótti, dep habarlaıdy Egemen.kz.
ZOOM platformasy arqyly uıymdastyrylǵan jıynǵa jaýapty sala jetekshileri men kásipkerler jáne ınvestorlar qatysty.
2021 jyly negizgi kapıtalǵa salynǵan ınvestısııalardyń ıgerilýin baıandaǵan kásipkerlik jáne ındýstrıaldy-ınnovasııalyq damý basqarmasy basshysynyń orynbasary B.Azımberdıev qalaǵa tartylǵan ınvestısııa kólemi 462 mlrd. teńgeni quraǵanyn atap ótti.
Onyń aıtýynsha, tartylǵan ınvestısııanyń 75%-y jekemenshik, 25%-y memlekettik ınvestııa bolyp tabylady. Al bıyl negizgi kapıtalǵa 540 mlrd. teńge ınvestısııa tartý josparlanǵan.
Qala basshysy Shymkenttiń ınvestısııa tartý áleýetiniń joǵary ekendigine toqtalyp, belgilengen mejemen shektelmeı, ınvestısııa tartý boıynsha jumystardy odan da arttyrýdy tapsyrdy. Qalaǵa ınvestısııa tartý icinde shtab jumysynyń tıimdiligin aıtyp, ınvestorlar úshin bıýrokratııalyq kedergiler azaıǵanyn jetkizdi.
Otyrysta «Tirkemeler men jartylaı tirkemeler óndirý», «Kúshtik transformatorlardy óndirý», «Aıaq kıim fabrıkasy» syndy jobalar tanystyrylyp, jergilikti ınvestorlardyń gazobeton óndirici, metall plıtka, gofr karton óndirisi, balabaqsha, balalar klınıkasy men jataqhana qurylysyn salý boıynsha jańa ınvest jobalar talqylandy.
Qala ákimi atalǵan jobalardy júzege asyrý boıynsha ákimdik tarapynan qajetti qoldaý bolatynyn aıtyp, salalyq basqarma basshylaryna naqty tapsyrmalar júktedi.