Polsha óz aýmaǵyna adamdardyń zańsyz kirýin toqtatý úshin Belarýspen aradaǵy shekaraǵa qabyrǵa salýdy bastady.
Polsha shekara kúzetiniń habarlaýynsha, eki el arasyndaǵy 5 metrlik bógettiń qurylysyna arnalǵan alańdar tapsyrma oryndaýshylarǵa berildi. Jumystar bir mezgilde tórt ýchaskede júrgiziledi.
Polsha-Belarýs shekarasynyń jalpy uzyndyǵy – 418 km. Shekaranyń kóp bóligi Býg ózeni arqyly ótedi.
Polsha úkimeti bul jobanyń quny 1,6 mlrd zloty, ıaǵnı 340 mln eýrony quraıtynyn habarlady. Qurylysqa qarajat el bıýdjetinen bólinedi. 186 shaqyrymdyq tosqaýyl maýsym aıynda daıyn bolýy kerek.
«Qazirgi ýaqytta shaǵyn-shaǵyn top bolyp Polsha-Belarýs shekarasyn zańsyz kesip ótýge tyrysatyndar kóp. Ádette 30 adamǵa deıin jınalyp, ruqsatsyz ótedi. О́tken jyldyń qazan aıynda mundaı toptardyń sany artyp, birneshe myńǵa jetti», deıdi Polsha Shekara kúzetiniń resmı ókili Krıstına Iаkımık-Iаrosh.
Bolashaqta qabyrǵany zamanaýı baqylaý quraldarymen jabdyqtaý josparlanýda.
Belarýs pen Latvııa, Lıtva jáne Polsha shekarasyndaǵy jaǵdaı 2021 jylǵy 8 qarashada kúrt nasharlady. Birneshe myń adam Belarýs jaǵynan Polsha shekarasyna keldi, keıbireýleri tikendi symnan jasalǵan qorshaýdy buzyp, Polsha aýmaǵyna ótýge tyrysty.
О́tken jyly Belarýstan Polshaǵa 40 myńǵa jýyq zańsyz kirgen mıgrant tirkeldi. Bir jyl buryn olardyń sany tek 122 bolatyn. Zańsyz ótýshiler sany artqannan keıin Polsha úkimeti tosqaýyl-qabyrǵa salý sheshimin qabyldady.