Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Nur-Sultan qalasyna jumys saparmen kelgen Túrki memleketteri uıymynyń (TMU) Bas hatshysy Baǵdad Ámireevpen kezdesti, dep habarlaıdy Egemen.kz mınıstrliktiń baspasóz qyzmetine silteme jasap.
Kelissózder barysynda taraptar Qazaqstannyń Túrki memleketteri uıymymen yntymaqtastyǵy máseleleri jáne uıymnyń kún tártibindegi ózekti taqyryptar jóninde pikir almasty.
Mınıstr Ystanbuldaǵy Túrki keńesiniń 8-shi sammıtinde qabyldanǵan sheshimderdi jáne Qazaqstan Prezıdenti Qasym-Jomart Toqaevtyń «Astana» Halyqaralyq qarjy ortalyǵynyń alańynda Túrki ınvestısııalyq qoryn qurý jáne ornalastyrý jónindegi bastamasyn tıimdi iske asyrýdyń mańyzdylyǵyn atap ótti.
Is-sapar barysynda Túrki memleketteri uıymynyń Bas hatshysy QR Memlekettik hatshysy Erlan Karın jáne QR Prezıdent Ákimshiligi basshysynyń orynbasary – Prezıdenttiń halyqaralyq yntymaqtastyq jónindegi arnaýly ókili Erjan Qazyhanmen ekijaqty kezdesýleri josparlanǵan.