Qańtardyń sońǵy kúninde Almatyda 1 556 adam indetke shaldyqqan. О́kinishke qaraı, indet juqtyrǵandar arasynda balalar kóbeıip keledi. Qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova aldyńǵy aptada 13 508 adam koronavırýs juqtyrsa, ótken aptada indet 14 213 almatylyqtan anyqtalǵanyn aıtty.
«Alaıda 27 qańtardan beri turaqtaný úrdisi tirkeldi. Jalpy, Almaty turǵyndaryna jaýapkershilik tanytqany úshin alǵys aıtqym keledi. О́ıtkeni bir apta ishinde qaıta vaksınalanǵandardyń sany 42 myń adamǵa nemese 36%-ǵa artty. Bul halyq arasynda ımmýndyq aralyqty 56,8%-ǵa deıin arttyrýǵa múmkindik berdi (vaksınalanǵandardyń 52,6%-y, pandemııa bastalǵannan beri aýyrǵandardyń 4,2%-y). Bul derttiń báseńdeýine áser etti», dedi Á.Qalyqova.
Ol indettiń jyl basynan beri Almatyda 18 ese óskenin alǵa tartty. Degenmen 20-39 jas aralyǵyndaǵy naýqastar sany 40%-dan 35%-ǵa deıin azaıdy.
«Biraq ótken aptada 14 jasqa deıingi balalar arasynda indet aıtarlyqtaı órship 5,4%-ǵa, al jasóspirimder arasynda 1%-ǵa kóterildi, sondaı-aq 60 jastan asqandar arasynda 3%-ǵa ósti. Bir jasqa deıingi balalar arasynda kerisinshe 450-den 438 jaǵdaıǵa deıin sál tómendegeni baıqalady. Biraq onyń úlesi balalar arasynda aıtarlyqtaı – 22,8%.
Al endi jumyssyzdar men ózin ózi asyrap otyrǵandar indetke nelikten jıi shaldyǵyp jatyr? Ásel Qalyqova ótken aptada jumys istemeıtin jáne ózin ózi jumyspen qamtyǵan almatylyqtar arasynda indet juqtyrý kórsetkishi – 33%, túrli uıymdar men keńselerdiń qyzmetkerleri – 22%, zeınetkerler – 20%, mektep oqýshylary – 9% jáne mektep jasyna deıingi balalar arasynda 6% bolǵanyn málimdedi.
Sońǵy taldaýlar almatylyqtardyń kóbinese indetti saýda-sattyq oryndarynan juqtyratynyn anyqtady. Odan keıin qoǵamdyq kólikter men úıdegi adamdardan bir birine juǵady.
Almatyda 27 qańtardan bastap Ashyq jobasyna qatysatyn nysandar úshin jumys jáne demalys kúnderindegi ýaqyt boıynsha jumys rejimi belgilenbeıtin boldy. Bilim berý mekemelerine bilim berýdiń kelesi formatyna ruqsat etilgen: ata-analardyń ótinishi boıynsha shtattyq formatta; jalpy bilim beretin mektepterdiń jumysy: 1-4 synyptar – shtattyq formatta; 660 balaǵa deıingi mektepter – shtattyq formatta; 600-den astam bala mektepter – 50% qýatymen shtattyq formatta.
Qalanyń sanıtarııalyq-epıdemıologııalyq baqylaý departamenti basshysynyń orynbasary KVI juqtyrǵandarmen baılanysta bolǵan naýqastarǵa qatysty shekteýler men ruqsattarǵa qatysty sózinde ekinshi komponentti alǵanyna 6 aıdan aspaǵan bolsa, revaksınalaý nemese COVID-19-ǵa qarsy vaksınalaýdyń tolyq kýrsyn alǵany týraly qujattyq rastaý bolǵan kezde úı karantınine oqshaýlanbaıtynyn jetkizdi. «Jetinshi kúni PTR ádisimen COVID-19-ǵa tekserý júrgiziledi. PTR-zertteýdiń teris nátıjesimen úı karantıni aıaqtalady. Eger jetinshi kúni COVID-19-ǵa zerthanalyq tekserý júrgizilmese, úı karantıni oqshaýlanǵan sátten bastap 10 táýlik ótkenge deıin jalǵasady», dedi ol.
ALMATY