Aıaǵy aýyr áıeldi koronavırýs ınfeksııasynan emdeıtin kezde qursaǵynda náreste bar ekenin bir sátke de umytýǵa bolmaıdy. Bul rette elimizde indet juqtyrǵan júkti áıelderdi emdeý úshin qandaı jaǵdaı jasalyp otyr?
Aqpannyń alǵashqy kúninde Almatyda indet aıtarlyqtaı azaıǵanyn aıta ketý kerek. Máselen, 1 aqpanda koronavırýs ınfeksııasyn juqtyrǵandar sany 1 037 bolsa, bir kún buryn 31 qańtarda 1 556 adamnan indet tabylǵan edi. Jalpy, ótken aıda epıdemııalyq ahýal nasharlaǵandyqtan, júkti áıelderdiń emine erekshe kóńil bólinip, №1 qalalyq klınıkalyq aýrýhanasynda 20 qańtardan bastap juqpaly akýsherlik blok ashyldy.
«Juqpaly akýsherlik bólim indet juqtyryp alǵan aıaǵy aýyr jáne jas bosanǵan áıelderge qyzmet kórsetedi. Arnaıy blok 80 tósektik orynmen jabdyqtalǵan. Onyń ishinde eresekterdiń 8 reanımasııa tósegi men jańa týǵan nárestelerge arnalǵan 6 reanımasııalyq kereýet qoıylǵan bólek akýsherlik operasııa bólmesi bar. Bosaný bólimshesin jabdyqtap, qamtamasyz etýge Almatydaǵy barlyq perzenthana men kópsalaly aýrýhana kómek kórsetti», deıdi №1 qalalyq klınıkalyq aýrýhananyń basqarma tóraǵasy – bas dárigeri Ernest Qalıev.
Stasıonarda kompıýterlik tomografııa, ýltradybystyq dıagnostıka, spırografııa júrgiziledi. Juqpaly akýsherlik blok aýrýhananyń ortalyqtandyrylǵan medısınalyq ottegimen qamtamasyz etilgen.
Qysqasy, indet juqtyrǵan júkti áıelder men olardyń jańa týǵan náresteleri medısına mamandarynyń erekshe kútimine muqtaj bolǵandyqtan, akýsherlik bólimshe qandaı jaǵdaı bolsa da kómek berýge beıimdelip otyr.
Juqpaly akýsherlik bólimshesiniń basshysy Sáýle Qabylova da Almaty qalasynyń perzenthanalar men qalalyq densaýlyq saqtaý mekemesi 3-deńgeıli perınataldyq kómek uıymdastyrýǵa barlyq jaǵynan kómekke kelgenin aıtady. Bul, ásirese, COVID-19 juqtyrǵan júkti áıelderdiń densaýlyǵyna baılanysty qosymsha máseleler týyndaǵan kezde asa mańyzdy.
Dárigerler óz tájirıbelerinde koronavırýs ınfeksııasyn juqtyrǵan júkti áıeldiń basqa aıaǵy aýyr áıeldermen salystyrǵanda jaǵdaıy kúrdeli jáne COVID-19 aýyr túrleriniń damý qaýpi joǵary bolatynyn biledi. Onyń ústine indetke shaldyqqan aıaǵy aýyr áıelder aı-kúni tolmaı jatyp bosanýy ábden múmkin ekenin de nazarda ustaý kerek.
ALMATY