Shymkent qalasynyń ákimi Murat Áıtenov Nurshýaq shaǵyn aýdany turǵyndarymen bolǵan kezdesýde aı saıyn ótkiziletin jeke qabyldaýdan bólek, ár toqsannyń bir aıyn turǵyndarmen kezdesýge arnaıtynyn jetkizdi, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
Ákim óz sózinde jyl basynan beri ózekti máselesi bar 32 shaǵyn aýdan men turǵyn alaby halqynyń máselesin tyńdaǵanyn atap ótti. Abaı aýdanyna qarasty bul shaǵyn aýdan turǵyndaryn elektr jaryǵy, tabıǵı gaz, mektep, emhana, kóshelerge shaǵal tas tóseý, qoǵamdyq kólik pen Ál-Farabı kóshesine shyǵatyn balama jol qarastyrý máselesi tolǵandyryp otyr.
Qala basshysy kóterilgen máselelerdiń sheshý jolyn sala jetekshilerimen talqylap, jergilikti turǵyndarǵa jumystyń atqarylý barysyn túsindirdi.
«Shaǵyn aýdannyń ózekti máselesin eskere otyryp, eń aldymen gaz, jaryqty sheshýdi qolǵa aldyq. О́zderińiz kórip otyrǵandaı byltyr taza aýyz sýmen tolyq qamtyldyńyzdar. Búgingi tańda elektr qýatyn jetkizý boıynsha jumystar júrgizilýde. Osy jyly gaz júıesin tartý jumystary bastalady. Onyń qurylysy 2023 jyly aıaqtalady dep josparlanýda. О́tken jyly 14 kóshege shaǵal tas tóselse, aýyz sý júıesi júrgizilgen 6 shaqyrym jolǵa shaǵal tas bıyl tóseletin bolady. Injenerlik kommýnıkasııalardyń qurylysy aıaqtalǵanda joldy asfalttaý jumystary bastalady», dedi ákim.
Budan bólek, shahar basshysy 2023 jyly Nurshýaq shaǵyn aýdanyna 1200 oryndyq mektep salynatynyn, eki eldi mekenge ortaq emhana qurylysy Yntymaq shaǵyn aýdanynda jeke ınvestor esebinen boı kóterip jatqanyn atap ótti. Zamanaýı emhana táýligine 500 adamǵa qyzmet kórsetýge qaýqarly.
Sóz sońynda turǵyndar ákimge ashyq dıalog tártibindegi kezdesýi úshin alǵysyn bildirip, jumystyń sapaly júrgizilýine atsalysatyndaryn aıtty.