Oqý jylynyń bastalǵaly beri elimizdegi mektep kitaphanalarynyń qory eki mıllıon dana kórkem ádebıetpen tolyqty. Bul týraly QR Bilim jáne ǵylym mınıstrliginiń baspasóz qyzmeti habarlady, dep jazady Egemen.kz.
Memleket basshysynyń tapsyrmasy boıynsha 2020 jyly Qazaqstanda «Oqıtyn mektep» jobasy bastaldy. Oǵan birqatar sharalar kiredi, atap aıtqanda: mektep kitaphanalaryn kórkem ádebıetpen qamtamasyz etý, oqýshylardy oqýǵa tartý úshin is-sharalar ótkizý, kitaphanalarda qolaıly jaǵdaı jasaý, kitaphanalardy jóndeý jáne jabdyqtaý, kitaphanashylardyń biliktiligin arttyrý.
Sonymen qatar, barlyq mektepterde kúndelikti 20 mınýttyq mindetti kitap oqý engizilgen.
Sondaı-aq, mektep kitaphanalarynyń janynan kovorkıng-ortalyqtar qurylýda. Elimizde barlyǵy 440 kovorkıng-ortalyq jumys isteıdi.
Qazaqstandyq joǵary oqý oryndarynyń kitaphanalary avtomattandyrylyp, qaıta jabdyqtalady. Bul baǵyttaǵy belsendi jumys stýdentterge kitap izdeý jáne alý boıynsha yńǵaıly servıs usyný, sondaı-aq kitaphanashylarǵa kitaphana qorymen jumys isteý úshin yńǵaıly qural jasaý úshin júrgiziledi.
«Bilim jáne ǵylym mınıstrligi JOO-lar, mektepter men kolledjderdiń aldyna oqýshylardyń oqýǵa degen qyzyǵýshylyǵyn arttyrý jáne qajetti aqparatty yńǵaıly izdeýdi qamtamasyz etý mindetin qoıdy. Sondyqtan qazir JOO-lar avtomattandyrylǵan júıelerdi engizý, ózgerister engizý, talaptarǵa sáıkes júıelerdi pysyqtaý jáne personaldy oqytý boıynsha sharalar qabyldaýda. Sonymen qatar JOO-lar kitaphana qoryn jańa basylymdarmen tolyqtyrýda. Eń bastysy, ýnıversıtet kitaphanalary mektep oqýshylary úshin ashyq bolady. Medıaresýrstar - elektrondy oqýlyqtar, ensıklopedııalar, quraldar jáne basqa da ádebıetter kóbeıdi. Basqa elektrondyq kitaphanalardyń tolyq mátindi jáne mýltımedııalyq resýrstaryna, sonyń ishinde Web of Science jáne Scopus halyqaralyq bazalaryna qol jetkizý qamtamasyz etildi. Bul sharalar stýdentterimiz úshin barlyq jaǵdaıdy jasaý úshin qabyldanyp jatyr», dedi Bilim jáne ǵylym vıse-mınıstri Qýanysh Erǵalıev.