9 aqpanda aımaq basshysy Nurlan Noǵaev Aqtaýdan jaldamaly turǵyn úı alǵan Jańaózen qalasynyń bir top turǵynmen, sondaı-aq Aqtaý qalasynyń kóp balaly analarymen kezdesti, dep habarlaıdy Egemen.kz Mańǵystaý oblysy ákimdiginiń baspasóz qyzmetine silteme jasap.
Ákimdikke kelgen áıelder Jańaózen qalasynan Aqtaý qalasyna qonystandyrý baǵdarlamasy boıynsha 2019-2022 jyldar aralyǵynda jalǵa berilgen páterlerin jekeshelendirip berýdi talap etti. Sondaı-aq, páterdi jalǵa alý jáne kommýnaldyq qyzmetter úshin tólenetin tólem aqysyn alyp tastaý týraly talaptaryn aıtty. Mańǵystaý oblysynyń ákimi Nurlan Noǵaev qoldanystaǵy zańnamaǵa sáıkes jalǵa beriletin turǵyn úı jekeshelendirýge jatpaıtynyn túsindirdi. - Aqtaý qalasynda jalǵa bergen páterlerdiń jalǵa alý merzimine shekteý qoıylmaıdy. Eger kelisim shartta tirkelgen adam qaıtys bolǵan jaǵdaıda, jalǵa alý kelisim-sharty qalǵan otbasy múshelerine uzartylyp beriledi. QR qoldanystaǵy «Turǵyn úı qatynastary týraly» Zańy boıynsha, Siz turatyn páterler kommýnaldyq turǵyn úı qorynan satyp alý quqyǵynsyz beriledi, jalǵa beriletin turǵyn úı jekeshelendirýge jatpaıdy. Kommýnaldyq qyzmetterge qatysty-eger sizdiń tabysyńyz tólemdi tolyq óteýge múmkin bolmasa, onda «turǵyn úı qatynastary» týraly Zańǵa sáıkes qajetti qujattar paketin jınap,Siz turǵyn úı kómegin ala alasyz, - dedi Nurlan Noǵaev. Turǵyn úıdi jaldaý aqysy turǵyn úıdiń kvadratyna baılanysty 8-den 12 myń teńgege deıin ózgeredi. Kezdesýge oblystyq máslıhat depýtattary da qatysyp, jınalǵandardy komıssııa jumysyn jalǵastyrýǵa shaqyrdy. Máslıhattyń birqatar depýtattary analar kótergen máselelerdi qaraý úshin Parlamentke hat joldady. Kezdesý qorytyndysy boıynsha komıssııa jumysyn jalǵastyrý týraly sheshim qabyldandy.