Úkimettiń jedel qabyldaǵan sharalarynyń nátıjesinde, Almaty qalypty tirshiligine oralyp keledi. Eger ótken aptada Almatyda 200-den asa kásipker qańtarda kórgen shyǵyndary úshin ótemaqy tólemderin alsa, ShOB sýbektilerine keltirilgen shyǵyndy óteý jónindegi óńirlik komıssııanyń 6 aqpandaǵy otyrysynda jalpy somasy 85,7 mln teńgeni qajet etetin taǵy 39 ótinim maquldandy. Onyń ishinde quny 8,4 mln teńge bolatyn 5 ótinim bıýdjet qarajatynan, 34 kásipkerdiń 77,3 mln teńge shyǵyny «Jańa Alataý» qaıyrymdylyq qory arqyly óteldi.
Komıssııanyń jumysy bastalǵannan beri barlyǵy 456,1 mln teńge somaǵa 260 ótinim maquldansa, onyń ishinde bıýdjet qarajatynan 157,1 mln teńgege 108 ótinim, qor qarjysynan 299 mln teńgege 152 ótinim qanaǵattandyryldy. Birinshi kezekte 5 mln teńgege deıingi tólem somasymen maıda jáne shaǵyn bıznesten túsken ótinimder jedel qaralýda.
Aımaqtyq komıssııa bızneske keltirilgen shyǵyndy óteý jónindegi qoldanystaǵy tetikke túzetýler engizýdi jalǵastyryp jatqanyn buǵan deıin de habarlaǵan edik. Máselen, eger buryn óńirlik komıssııanyń usynysy boıynsha ótemaqy jeke aýdıtorlar men baǵalaýshylardyń qyzmetterine arnalǵan shyǵyndardy qamtysa, endi sot saraptamasyn júrgizý úshin bıýdjet qarjysy esebinen jeke advokattarǵa arnalǵan shyǵyndar da tólenýi múmkin.
«Qylmystyq is júrgizý kodeksiniń qoldanystaǵy normalaryna sáıkes sot saraptamasyn júrgizýge materıaldardy daıyndaýǵa tergeýshi ǵana emes, onyń suraýy boıynsha advokat ta jiberiledi. Qazirgi kezde tergeýshilerdiń jumysy kóp ekenin eskere otyryp, sot saraptamasyn júrgizýdi jedeldetý jáne ótemaqy tólemin alý maqsatynda tártipsizdik kezinde zardap shekken kásipkerlerge jeke advokattardyń qyzmetine júginýdi usynamyz. Qazir kásipkerler bul qyzmetterdi óz qarjysy esebinen tóleı alady, alaıda biz bıýdjet qarajaty esebinen shyǵyndy óteýge advokattyq qyzmetterge arnalǵan shyǵystardy qosý jóninde usynys ázirlep jatyrmyz. Bul shara zardap shekken bızneske memlekettik qoldaý kórsetýdi keńeıtýge jáne qala ekonomıkasyn odan ári qalpyna keltirýdi jedeldetýge múmkindik beredi», dedi ShOB sýbektilerine keltirilgen zalaldy óteý jónindegi óńirlik komıssııanyń tóraǵasy, Almaty qalasy kásipkerlik jáne ınvestısııalar basqarmasynyń basshysy Erkebulan Orazalın.
ALMATY