Áleýmettik jelilerde Shymkent qalasynda aǵashtardyń qaryn silkip, túsirýge bıýdjetten 600 mıllıon teńge qarjy bólingendigi týraly aqparat tarap júr. Osyǵan baılanysty qala ákiminiń orynbasary E. Bilisbekov aqparattyq-kommýnıkasııalar ortalyǵynda brıfıng ótkizdi, dep habarlaıdy Egemen.kz.
Ákim orynbasary Shymkent qalasynyń 2022-2024 jyldarǵa arnalǵan bıýdjeti Qazaqstan Respýblıkasynyń tıisti zańdarynda kórsetilgen talaptarǵa sáıkes qalyptastyrylatynyn jáne qalanyń jasyl jelekterin kútip ustaý, jańa aǵashtar otyrǵyzý, merzimdik dárileý, sýarý, butaý, aqtaý jáne qardan tazartý sekildi birneshe jumystardy qamtıtynyn aıtty.
Sondaı-aq, osy jumystardy atqaratyn azamattardyń eńbekaqysy, sol jumysqa paıdalanylatyn kólik pen arnaıy tehnıkanyń janar-jaǵar maıy men ózge de shyǵyndary kiretinin naqtylady.
«Shymkent qalasynyń aýmaǵy 116 myń gektardy alyp jatyr. Qazirgi ýaqytta qala aýmaǵynda 6 mıllıonnan astam túp aǵash bar. Budan bólek, qala aýmaǵynda 8 saıabaq pen 39 gúlzar bar. Al, áleýmettik jelilerde kórsetilgen qardy silkip túsirý jumystary jalpy jasyl jelekti kútip ustaý jumystarynyń kóptegen baǵyttarynyń bir tarmaǵy ǵana. Iаǵnı, mundaı jumystar qaýipsizdik maqsatynda adamdar jıi júretin kópshilik oryndardaǵy 66 220 túp aǵashta júrgiziledi dep josparlanyp, qarjylyq smetalyq shyǵyndary 600 mıllıon emes 891,4 myń teńgeni quraıdy dep bekitilgen», dedi E. Bilisbekov.
Onyń aıtýynsha, qys mezgilinde qar jaýmaǵan jaǵdaıda bul qarjy tolyqtaı bıýdjetke keri qaıtarylady.
Sóz sońynda qala ákiminiń orynbasary jelide taralǵan aqparat shyndyqqa janaspaıtynyn aıtyp, BAQ ókilderinen resmı jáne shynaıy aqparatty ǵana taratýǵa shaqyrdy.