Jaqynda áleýmettik jelini paraqtap otyryp, oblystyq tarıhı-ólketaný mýzeıinde turǵan bir jádiger jaıly qyzyq málimetke jolyqtyq. Qyzyǵy sol, 1986 jyly Keńes Odaǵynyń avtokólik óndirisindegi iri kásiporyn Gorkıı avtomobıl zaýytynan GAZ-24 markasymen nebári 4 «Chaıka» kóligi shyǵarylady. Sonyń biri halyq sharýashylyǵyndaǵy eń joǵary kórsetkishterge jetken Qyzylorda oblysyna buıyrypty.
Sol tusta oblystyq partııa komıtetin Sosıalıstik Eńbek Eri Erkin Áýelbekov basqaryp otyrǵan-dy. Kólikti jetkizý oblystyq atqarý komıtetiniń tóraǵasy Vıtalıı Brynkınge júktelipti.
Sonymen tapsyrmany oryndaýǵa jiberilgenderdi Vnýkovo áskerı aeroportynan kútip alǵandar jabyq ǵımaratqa ákelip, qatar turǵan 4 kóliktiń bireýin tańdatady. Sol jerden áskerı ushaqqa tıelgen «Chaıka» Baıqońyrǵa jetkizilip, ǵaryshkerler qalasynda kólikke otyrǵan júrgizýshiler oblystyq partııa komıtetiniń garajyna kirgizedi. Sol kúnnen eshkim minbegen qymbat kólik 2005 jyly oblystyq tarıhı ólketaný mýzeıine syı retinde tapsyrylypty.
– Halyqaralyq mýzeıler kúnine oraı jyl saıyn «Mýzeıge syı» aksııasyn ótkizip, kelýshiler osy kólikti tamashalaıdy. Balalar da, úlkender de sırek kólikke minip, sýretke túsedi, – deıdi mýzeıdiń bas qor saqtaýshysy Amankúl Dúısenbaıqyzy.
Uzaq jyl garajda turǵan qymbat avtokólikti oblystyq partııa komıtetinen, keıin onyń ornyn basqan ákimdikten eshkimniń izdemegeni, paıdalanbaǵany túsiniksiz bolyp otyr. Jalpy, tehnıkaǵa qatysty málimettiń bárin zerttep, qattap júretin reseılikterdiń dereginshe sol elden shyqqan kólik jylyna orta eseppen 17 500 shaqyrym jol júrý kerek eken. Al mýzeı aýlasynda turǵan «Chaıkanyń» kılomertajy 36 jylda bar bolǵany 18 220 shaqyrym júrgenin kórsetip tur.
QYZYLORDA