Stýdentterdiń jataqhana máselesi kún tártibinen túspeı tur. Bul máseleni Úkimet memleket-jekemenshik áriptestigi arqyly sheship keledi. Osyndaı jolmen bıyl 11 057 oryndyq 32 jataqhana paıdalanýǵa berilmek. Bul týraly Prezıdent janyndaǵy Ortalyq kommýnıkasııalar qyzmetinde ótken brıfıngte aıtyldy.
Baspasóz konferensııasynda sóz alǵan «Qarjy ortalyǵy» AQ basqarma tóraǵasy Asqar Ibraımov:
– О́zderińiz biletindeı, 2018 jyly Elbasy N.Nazarbaev Bes áleýmettik bastamasyn jarııalaǵan bolatyn, solardyń biri stýdent jastardyń ómir súrý jaǵdaıyn jaqsartýǵa baǵyttalǵan. Osy mindetke qol jetkizý úshin jekemenshik sektordyń aýqymdy qatysýyn kózdeıtin memlekettik tapsyrysty ornalastyrý tetigi ázirlendi. Qazirgi tańda elimizde stýdentter turý úshin 63 myńnan asa oryn-jaı qajet. Bul – megapolısterden bastap oblystyq mańyzy bar qalalarǵa deıingi elimizdiń barlyq óńirine tán qajettilik. Buǵan deıin 30 630 oryndyq 124 jataqhana paıdalanýǵa berildi. Sondaı-aq aldyn ala jasalǵan sharttar, jergilikti bıýdjet qarajatynan nysanaly qurylys, menshikti qarajat jáne demeýshilik qarajat esebinen 2022 jyly 11 057 oryndyq 32 jataqhanany paıdalanýǵa berý josparlanyp otyr, – dedi.
Spıkerdiń aıtýynsha, jataqhanalar salý jobasy memlekettik kásipkerler úshin tapsyrysty ornalastyrýmen qatar qosymsha tabys kózi bola alady. О́ıtkeni stýdentterdiń aı saıynǵy turý aqysy memlekettik tapsyrystyń qunyna kirmeıdi. Onyń mólsherin jataqhana ıesi retteıdi jáne naqty óńirdegi turǵyn úı naryǵynyń jaǵdaıymen anyqtalady. Sondaı-aq turmystyq qyzmet kórsetý úshin kommersııalyq alańdar (ashana, shashtaraz, jattyǵý zaly jáne t.b.) jasaýǵa múmkindik bar, olardyń negizgi tutynýshylary óz turǵyndary bolady.
– Tutastaı alǵanda, barlyq obektiler men ony odan ári paıdalaný qoldanystaǵy qurylys, órtke qarsy jáne sanıtarlyq-epıdemııalyq normalarǵa qatań sáıkestikte júrgizilýge tıis. Qarjy ortalyǵy úılestiretin bilim berý salasyndaǵy áleýmettik jobalardyń taǵy biri – Qazaqstanda 2013 jyldan beri iske asyrylyp kele jatqan Aqyl memlekettik bilim berý jınaqtaý júıesi (MBJJ). MBJJ respýblıkamyzdyń kez kelgen azamaty úshin ózine nemese balanyń atyna bilim berý jınaqtaý salymyn ashýǵa múmkindik beredi. MBJJ-nyń basty artyqshylyǵy, salymdarǵa 9 paıyzǵa deıingi bank syıaqysynan bólek memleketten syılyqaqy esepteledi. Memleket syılyqaqysynyń jyldyq mólsheri negizinen 5 paıyzdy, halyqtyń áleýmettik turǵydan álsiz tobyndaǵy azamattarǵa 7 paıyzdy quraıdy. Biraq depozıtti jumsaýdyń qatań tártibi bar, jınaqtalǵan qarajatpen salymshy elimizde, sondaı-aq shetelde oqýdyń aqysyn tóleýi tıis, – dedi A.Ibraımov.
JOO-ǵa nemese kolledjge aqyly negizde oqýǵa túskennen keıin salymshy depozıt ashylǵan bankke JOO-men nemese kolledjben jasalǵan shartty usynady, bank oqý aqysyn salymshynyń shotynan tikeleı bilim berý uıymyna aýdarady. Eger oqýdyń barlyq merzimine aqy tólegennen keıin depozıtte qarajat qalsa, salymshynyń aqshany túgeldeı shyǵaryp alýǵa quqyǵy bar.
– Al bala grantqa túsken jaǵdaıda salymshy: barlyq qarajatty bank syıaqysymen jáne memleket syılyqaqysymen birge alýǵa, qarajatty Qazaqstan Respýblıkasynyń azamaty bolatyn úshinshi tulǵanyń bilim berý salymyna aýdarýǵa, bilim berýdiń basqa deńgeılerine (magıstratýra) aqy tóleý úshin qarajat jınaqtaýdy jalǵastyrýǵa quqyly. Atalǵan salym Qazaqstannyń depozıtterge kepildik berý qory tarapynan saqtandyrylǵan (10 000 000 teńgege deıin shektelgen) jáne memlekettik organdar tarapynan kez kelgen tyıym salýlar men shekteýler qoıylýdan zańnamamen qorǵalǵan. 2022 jyldyń basynda tirkelgen derek boıynsha 21 139 salym bar, salymshylardan jalpy somasy 30 734 235 myń teńgeni qurady, – dedi Qarjy ortalyǵynyń basshysy.