Aqtaý qalasyndaǵy ónerkásiptik aımaq aýmaǵynda úsh azamat ustaldy. «Gazel» avtokóliginiń bort bóliginen marıhýana esirtki zaty bar 8 qorap tabyldy, dep habarlaıdy Egemen.kz Mańǵystaý oblystyq polısııa departamentine silteme jasap.
Esirtki qylmysyna qarsy is-qımyl basqarmasynyń qyzmetkerleri jedel-aldyn alý is-sharasyn júrgizý kezinde «Gazel» markaly avtokóliginiń bort bóliginen jalpy salmaǵy 185 kılogramm 980 gramm bolatyn sary tústi marıhýana esirtki zaty bar 8 qorapty taýyp, tárkiledi.
«Bul esirtki zaty ońtústik oblystardan Mańǵystaý oblysynyń aýmaǵyna odan ári ótkizý úshin ákelindi. 38 jastaǵy áıel men 28 jáne 31 jastaǵy er adamǵa qatysty qylmystyq is qozǵaldy. Ustalǵandar ýaqytsha ustaý ızolıatoryna qamaldy. Qajetti jedel-tergeý amaldary júrgizilýde», delingen polısııa habarlamasynda.