Ystanbul qalasynda ótken VIII halyqaralyq etnosport mádenı festıvalinde (Ethnosport Culture Festival) el namysyn qorǵaǵan Balqash pen Baıanaýyldyń qos tazysy álem nazaryn aýdartty. Sóıtip, balqashtyq tazy Aqbaqaı halyqaralyq medalǵa ıe boldy.
Tórt kúnge sozylǵan dúbirli etnofestıval álemniń jıyrmadan astam elinen kelgen sportshylar men mádenıet janashyrlarynyń basyn qosty. Bási bıik bul doda ulttardyń salt-dástúri men tól mádenıetin toǵystyratyn aýqymdy is-shara retinde salmaǵy bar. Festıval barysynda júırik tazy júgirtken ıtbegilermen qosa, búrkitshiler qus salyp, kóshpeliler mádenıetiniń qyr-syryn áıgiledi.
Mádenı kóshte kópshiliktiń kózaıymyna bólenip, baspasóz betteriniń basty taqyrybyna aınalǵan Balqash qalasynyń turǵyny Aǵybaı Jasanbekovtiń Aqbaqaı atty tazysy edi. Eki qar basqan (2 jasar) Aqbaqaı júıriktigimen, turpatymen, symbatymen sheteldik qonaqtardy súısindirdi. Nátıjesinde, qazaq tazysy festıvaldyń arnaıy medalimen marapattaldy. Búkilálemdik etnosport federasııasynyń ókilderi de qumaı tazyǵa erekshe qyzyǵýshylyq tanytqan. Aqbaqaıdyń ıesi Aǵybaı Túrkııaǵa ózi bara almaı, baptaǵan júırigin dosy Aıbat Tileýovke amanattap, attandyrǵan edi.
– Bizdiń qazaq tazylary alys-jaqyn shetelderde moıyndalyp júr. Dosymnyń aıtýynsha, Aqbaqaıdyń tektiligine tánti bolǵan sheteldikter ony qomaqty qarjyǵa satyp alýǵa da usynys jasaǵan. Soǵan qaraǵanda tazym festıvaldyń jańalyǵy bolǵan sekildi, – deıdi maqtanyshpen Aǵybaı Jasanbekov.
Aqbaqaıdyń ıesi Aǵybaıdyń tazy men tóbet ósirip kele jatqanyna 20 jylǵa jýyqtaǵan. Ol Aqbaqaıdy sonaý Mańǵystaý oblysynan, bir aılyq kúshik kezinde aldyrtypty. Tazy qoıan men túlki qýyp, ańshylyqtyń qyr-syryn meńgergen. Sonymen qosa aýdandyq deńgeıdegi «shyrǵa tartý» jarystaryna qatysyp, shyńdalǵan. Jyldamdyǵy, tózimdiligi men aqyldylyǵy tańǵaldyryp otyr.
«Júırik tazymnyń tuqymyn kóbeıtýdi josparlap otyrmyn. Aldaǵy ýaqytta túrli halyqaralyq kórmeler men baıqaýlarǵa qatysyp, tazymyzdy álemge tanytqymyz keledi. Sol arqyly óskeleń urpaqtyń boıynda ulttyq qundylyqtarǵa degen súıispenshilikti oıatsaq deımiz», deıdi ıesi.
Búginde keıipkerimiz tazylaryn Balqash áýejaıynyń mańyndaǵy shaǵyn aýmaqta jattyqtyryp júr. Tulparlarymen ulttyq sport túrlerine daıyndyqty osy mańda ótkizetin kórinedi. Alaıda ýaqyt ótken saıyn bul jer tarlyq etip keledi. Saıatshynyń aldaǵy armany – Balqash qalasynda qazaqy ıt tuqymdaryn saqtap, damytatyn jeke pıtomnık ashý.
Qaraǵandy oblysy