Qonaev qalasynda maýsymnyń alǵashqy kúninen bastap shomylý maýsymy resmı túrde ashyldy. Bıyl jaǵajaılarda qaýipsizdik sharalary kúsheıtilip, jańa demalys oryndary men 9D kınoteatr iske qosyldy.
Qala ákimi Ashat Berdihanov kommýnaldyq jaǵajaılar demalýshylardy qabyldaýǵa tolyq daıyn ekenin málimdedi. Ásirese №5 jaǵajaıda qaýipsizdik máselesine erekshe kóńil bólingen. Munda 12 qutqarý munarasy ornatylyp, 26 qutqarýshy jumys isteıdi. Sonymen qatar jaǵajaı aýmaǵyna 21 beınebaqylaý kamerasy qoıylǵan. Onyń ishinde jasandy ıntellekt júıesimen jumys isteıtin kameralar da bar. Barlyq qurylǵylar jedel basqarý ortalyǵyna qosylǵan.
Jaǵajaı aýmaǵynda sanıtarlyq toraptar men tamaqtaný oryndary jumys isteıdi. Kún saıyn arnaıy qyzmetkerler jaǵalaýdy birneshe ret qoqystan tazartady. Al jaıaý júrginshiler úshin kirý tegin.
Bıyl №5 jaǵajaıda jańa 9D kınoteatry ashyldy. Zamanaýı attraksıon formatyndaǵy kınoteatrda kórermender fılmdi arnaıy dybys, qozǵalys, ózge de effektiler arqyly shynaıy sezine alady. Sonymen qatar qalada jańa oıyn-saýyq oryndary kóbeıip keledi. Sonyń biri «Jibek joly» JShS salyp jatqan attraksıondar parki 10 maýsymǵa qaraı kelýshilerge esigin aıqara ashatyn bolady.
«Bul park birneshe jyldan beri salynyp jatyr. Qazir sońǵy daıyndyq jumystary aıaqtalýda. Jaqyn kúnderi demalýshylardy qabyldaı bastaıdy», dedi qala ákimi.
Qalada bıyl jańa formattaǵy demalys oryndary da ashylýda. Sonyń biri – «VE RICCI» demalys aımaǵy. Keshen otbasylyq demalysqa arnalǵan. Munda jaıly vıllalar, basseınder, tynyǵýǵa arnalǵan arnaıy aýmaqtar qarastyrylǵan.
Bıyl týrıstik baǵytta 11 ınvestısııalyq jobany júzege asyrý josparlanyp otyr. Onyń ishinde qonaqúıler, demalys oryndary men golf-klýb qurylysy bar.
Qaýipsizdik máselesi de basty nazarda. Qalalyq tótenshe jaǵdaılar basqarmasy jaǵajaılarda saǵat 20:00-den keıin shomylýǵa tyıym salynatynyn habarlady. Kún saıyn patrýldeý uıymdastyrylyp, keshki ýaqytta arnaıy reıdter júrgiziledi.
Qala turǵyndary men týrıster de shomylý maýsymynyń ashylýyn qýana qabyldady. Ashyq sýda júzýden Qazaqstan jáne álem chempıony Ámına Shynádil Qapshaǵaı sý qoımasy sý sportyn damytý baǵytynda qolaıly oryndardyń birine aınalyp kele jatqanyn aıtty.
Qonaevta aldaǵy ýaqytta 5 shaqyrymnan astam jaǵajaıdy abattandyrý josparlanǵan. Jumys kezeń-kezeńimen júzege asady.
Almaty oblysy