Bıyl Qazaqstannyń halyq jazýshysy Márııam Hákimjanovanyń týǵanyna 115 jyl tolady. Soǵan oraı elordadaǵy Ulttyq mýzeıde «Tań Sholpan» halyqaralyq táýelsiz sýretshi áıelder qorynyń uıymdastyrýymen jyl saıyn ótetin ıgi dástúrge aınalǵan «Tań Sholpan» atty kórme ótti.
Mazmundy shara aldymen kórnekti aqynnyń shyǵarmashylyǵy men qaıratkerligine arnalǵan dóńgelek ústel májilisimen bastaldy. Onda sóz alǵan zııaly qaýym ókilderi qalamgerdiń ómiri men óneri týraly aıta kelip, búginde shyǵarmashylyqpen aınalysyp júrgen áıelder jaıynda da salmaqty oı qozǵady. Sondaı-aq qoǵamdaǵy sýretshilerdi mazalaǵan ózekti máseleler de aıtyldy.
Odan keıin is-shara kórmeniń ashylýyna ulasty. Munda Ulttyq mýzeıdegi О́nertaný bóliminiń jetekshisi Eldos Mertenov mereıtoı ıesiniń shyǵarmashylyǵyna jan-jaqty toqtaldy.
− Márııam Hákimjanova poezııasynan Otan, ómir, beıbitshilik týraly tolǵaǵan azamattyq ún aıqyn ańǵarylyp turady. Ol kisiniń túrli aýyrtpalyqty keshken ómir jolyn kópshilik bile bermeıdi. Sondyqtan búgingi kórmeniń, ásirese jastar úshin oı túıetin tálimi mol» deı kelip, osy is-sharany ótkizýge muryndyq bolǵan azamattarǵa rızashylyǵyn jetkizdi.
Kórmege 47 sýretshiniń 123 týyndysy qoıyldy. Ol sýretshilerdiń bári de jalpaq elge esimderi tanys, respýblıkalyq, halyqaralyq baıqaýlardyń laýreattary. Olardyń barlyǵyn álemge kózqarastary men kórkem tili, pishin men kompozısııa máneri biriktiredi.
«Tań Sholpan» halyqaralyq táýelsiz sýretshi áıelder qorynyń prezıdenti, Qazaqstan Sýretshiler odaǵynyń múshesi Jámılá Táken óz sózinde atalǵan qor − sýretshi áıelderdiń shyǵarmashylyq damýyna arnalǵan alań, onda árbir sýretshi óziniń biregeı kórkemdik stıli men kompozısııalyq ıdeıasyn kórsetedi deıdi.