Qarmaqshy aýdandyq mádenıet jáne tilderdi damytý bóliminiń K.Rústembekov atyndaǵy Jyraýlar úıi Syr súleıi Turmaǵambet Iztileýovtiń týǵanyna 140 jyl tolýyna oraı jyraý shyǵarmalaryn nasıhattaý maqsatynda «Turmaǵambet jyrlary – jańa ǵasyr kóginde» atty aýdandyq kórkemsóz oqý sheberleriniń baıqaýyn uıymdastyrdy.
Baıqaýǵa Josaly kenti men eldi mekenderdegi mektepterden 30 talapker qatysty. Aýdandyq mádenıet jáne tilderdi damytý bóliminiń basshysy Dáýren Erjanov nazym sózdiń shyn jibegin shıratqan shaıyr atyndaǵy baıqaýǵa qatysýshylarǵa sáttilik tiledi.
Qazylar sheshimimen kishi top boıynsha bas júldeni Aıdana Ulanbek aldy. Úlken toptaǵy bas júlde Marjan Berikbolǵa buıyrdy. Qalǵan oryn ıeleri men qatysýshylar arnaıy alǵys hattar jáne syılyqtarmen marapattaldy.
Jyl basynan óńirde Turmaǵambet Iztileýovtiń týǵanyna 140 jyl tolýyna oraı mádenı sharalar legi bastaldy. Jaqynda ǵana oblystyq fılarmonııada dástúrli oryndaýshylardyń «Tuǵyry bıik – Turmaǵambet» atty konserti ótti.
Ulttyq rýhanııatty Shyǵystyń sarqylmas mol murasymen baıytqan shaıyr atyndaǵy respýblıkalyq deńgeıde sharalar uıymdastyrý da josparlanýda.
Qyzylorda