Kún uzarǵanymen, Qostanaı óńirinde áli qalyń qar siresip jatyr. Bul jaqtyń erte kókteminde eljirep turyp, eseńgiretip ketetin minez bar. Mysaly, keshe ǵana, 12 naýryzda tabıǵat taǵy tosyn minez kórsetip, aımaqty aq tútek boranǵa orady. Oblystyq tótenshe jaǵdaı qyzmetiniń málimetine qaraǵanda, oblystyń Qamysty, Sarykól, Naýyrzym, Jangeldın aýdandary men Arqalyq, Jitiqara qalalarynyń mańaıynda qutqarýshylar jolda qalǵan 100-den asa jolaýshyny qar qursaýynan shyǵaryp alǵan.
– Bir táýlik ishinde 122 adam qutqaryldy. Onyń ishinde 7 sábı bar. Qarǵa batyp qalǵan 9 avtokólikti shyǵaryp aldyq. Mysaly, 12 naýryzda tańǵy saǵat 04.50-den 11.45-ke deıin qutqarýshylar Arqalyq pen Alýa aýylynyń arasyndaǵy kúre jolda 8 jeńil avtokólik pen 49 adamdy evakýasııalady. 21 jolaýshy Arqalyqqa, qalǵandary jaqyn mańaıdaǵy eldi mekenderge ornalastyryldy, – dep málimdedi oblystyq TJ-nyń baspasóz qyzmeti.
Dál osy kúni Naýyrzym aýdanyndaǵy Dámdi aýylynan 15 shaqyrym qashyqta jatqan tas joldyń boıynda 50 jolaýshysy bar 17 jeńil avtokólik pen 1 júk kóligi qar qursaýynda qalǵan. Qutqarý qyzmetiniń jigitteri alty saǵat boıy arpalysyp júrip jolaýshylardyń bárin aman-esen Dámdi mektebinde ornalasqan jylyný pýnkti men aýyl turǵyndarynyń úılerine jetkizdi. Jolaýshylar jol ashylǵansha osy aýylda ystyq as iship, tynyǵyp uıyqtap alǵan. Tótenshe jaǵdaı departamenti ókilderiniń aıtýynsha, qutqarý operasııasy oıdaǵydaı ótkendikten, jol ústinde qalǵandardyń bári medısınalyq kómekten bas tartqan, denesin úsik shalǵan eshkim joq.
Jolaýshylardyń ishinde jas bala ertken eki ana Dámdi aýylynyń ýchaskelik ınspektory Nurjan Ismadıarovtyń úıine túnep shyǵypty. 4 jasar jáne jasqa tolmaǵan eki balasy bar Symbat Dúısenova sol kúni Qostanaıdan Torǵaıǵa baratyn taksıge mingen eken.
– Qostanaıdan shyqqanda kún ashyq bolatyn. Dámdige jete bergende aýa raıy kúrt buzylyp, qarly boran kóterilip ketti. Sálden soń kólik qarǵa batyp, múlde qozǵala almaı qaldyq. Jol talǵamaıtyn aýyr kólikpen kómekke jetken polısııa qyzmetkeri birden úıine aparyp, et asyp qudaıy qonaq etip, qurmet kórsetti. О́zderiniń de segiz aıǵa tolǵan náresteleri bar eken, – dedi jas ana.
Jórgektegi sábıin baýyryna qysqan Kúljamal Taımasovanyń, kerisinshe, Amangeldiden Qostanaıǵa qaraı kele jatqan beti eken. Dál osy Dámdiniń tusynan óte bergende qarly borannyń astynda qalypty.
– Mashınamyz toqtap qalǵanda qatty qorqyp kettim. Ýchaskelik ınspektorǵa alǵysym sheksiz. Zaıyby Aqmaral da qoly ashyq, qonaqjaı adam eken. Balam ekeýmizdi óz týǵanyndaı qarsy aldy, – dedi Kúljamal.
Qonaqtaryn úıine jaıǵastyrǵan Nurjan Ismadıarov aýyldyń mańaıynda qutqarý sharalaryn júrgizip jatqan TJ qyzmetkerlerine kómektesý úshin qaıtadan kúre joldyń boıyna ketedi. Túni boıy kóz ilmegen qutqarýshylar jolaýshylardyń bárin mekteptiń jyly ǵımaraty men aýyl turǵyndarynyń úılerine ornalastyrǵan.
Qostanaı oblysy