Taǵy bir ýnıversıtet jabyldy

Bul joly Z.Aldamjar atyndaǵy Qostanaı áleýmettik-tehnıkalyq ýnıversıteti jabyldy. Mınıstrliktiń málimdeýinshe, osyǵan deıin Bilim jáne ǵylym salasyndaǵy sapany qamtamasyz etý komıtetine ýnıversıtet qyzmetkerlerinen shaǵym­dar túsipti. Atalǵan shaǵymdar ýnıversıtet­te jos­pardan tys tekserý júrgizýge sebep bol­ǵan. Ná­tı­jesinde, komıssııa tekserý paraǵynyń 46-tar­ma­ǵynyń 35-i boıynsha zańsyzdyqtardy anyqtady.

Bilim jáne ǵylym salasyndaǵy sapany qamta­ma­syz etý komıteti tóraǵasynyń orynbasary Mánshúk Ábdikárim: «Bizdiń basty mindetimiz – elimizde bilim men kadrlar daıarlaýdyń sapasyn arttyrý. Eger búgin ýnıversıtetter tıisti talaptarǵa saı bolmasa, onda erteń bilimi men biliktiligi jumys berýshilerdiń suranysyna saı kelmeıtin mamandardy shyǵaramyz. Árıne, tekserý jáne lısenzııany qaıtaryp alý – sapaly bilim berýdi emes, tek paıda tabýdy birinshi orynǵa qoıatyndar úshin tıimsiz shara. Mınıstrlik birinshi tekserýden keıin JOO basshylyǵyna buzýshylyqtardy joıýǵa ýaqyt beredi. Biraq kóbine olar sot talqylaýlaryna ýaqyt jumsaýdy jón sanap, kemshilikti joıýǵa asyqpaıdy. Árıne, bul ýnıversıtettiń jabylý ýaqytyn edáýir keshiktirip, stýdentterden tólem túrinde kiris alýǵa múmkindik beredi», deıdi.

M.Ábdikárimniń aıtýynsha, ýnıversıtet qyz­me­ti­ne qatysty shaǵymdar 2020 jyldan bastap túse bastaǵan.

Komıssııa jumysynan soń ýnıversıtet tara­­pynan tekserý nátıjelerine shaǵym túsken. Alaı­da birinshi jáne ekinshi satydaǵy sottardyń she­shim­derimen komıtettiń tekserý nátıjeleri bo­ıynsha bar­lyq ákimshilik akti ózgerissiz qaldyrylyp, ýnı­ver­­sıtettiń shaǵymdary qanaǵattandyrylmady. Endi ony Joǵarǵy sot qaraıdy.

Sonymen qatar komıtettiń sheshimimen ýnıversıtet bas lısenzııasynan aıyryldy. Bul sheshimge qa­ty­s­ty da ýnıversıtet tarapy sotqa shaǵymdandy.