HHI halyqaralyq «Jibek joly» matematıkalyq olımpıadasynda qazaqstandyq 46 oqýshy júldeger atandy. Zııatkerlik saıysqa Uly Jibek jolynyń boıyndaǵy elderden júzdegen mektep oqýshysy qatysty.
Osy dodada daralanǵan darabozdar halyqaralyq IMO olımpıadasyna qatysý úshin Qazaqstannyń ulttyq quramasyna kirý múmkindigine ıe bolady. Osyǵan qosa júldegerlerdiń dıplomdary bolashaqta ýnıversıtetterge túsýde artyqshylyq beredi. Mysaly, eger úmitkerler birdeı upaı jınasa, onda basymdyq, ıaǵnı oqýǵa túsý quqyǵy olımpıadashyǵa beriledi.
Ál-Farabı atyndaǵy Qazaq ulttyq ýnıversıtetinde oflaın formatta ótken «Jibek joly» olımpıadasyna Qazaqstan, О́zbekstan, Qyrǵyzstan, Túrikmenstan, Túrkııa, Ázerbaıjan, Qytaı, Tájikstan jáne Uly Jibek jolynyń boıynda ornalasqan basqa da elderden oqýshylar qatysty.
«Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov: «Bıyl «Jibek joly» matematıkalyq olımpıadasyna 10 eldiń komandasy qatysty. Qazaqstannan 7-11-synyp aralyǵyndaǵy 136 oqýshy qatysty. Olardyń barlyǵy – «Matematıka» páni boıynsha 2020-2021 oqý jylynyń respýblıkalyq olımpıadasynyń jáne respýblıkalyq jasóspirimder olımpıadasynyń oblystyq jáne qorytyndy kezeńderiniń jeńimpazdary men júldegerleri. «Jibek joly» olımpıadasynyń qorytyndysy boıynsha upaılar jeńimpazdarǵa Halyqaralyq matematıkalyq olımpıadaǵa (IMO) qatysý úshin Qazaqstan Respýblıkasynyń ulttyq qurama komandasyna kirýge múmkindik beretinin atap ótkim keledi», deıdi.
Uıymdastyrýshylardyń aıtýynsha, olımpıadany ár el óz aýmaǵynda ótkizgen. Alaıda barlyq memleketten kelgen zııatkerlik jarysqa qatysýshylardyń qorytyndy nátıjelerin Qazaqstanda bolǵan qazylar alqasy qarady.
Olımpıada nátıjesi boıynsha 8 oqýshy I dárejeli, 14 oqýshy II dárejeli jáne 24 oqýshy III dárejeli dıplomdarmen marapattaldy. Al 2021 jyly qazaqstandyq zııatkerler Halyqaralyq «Jibek joly» matematıkalyq olımpıadasynda 3 altyn, 19 kúmis jáne 27 qola medal jeńip alǵan bolatyn.