Aldaǵy 1-2 sáýirde «Astana Balet» teatrynda Irjı Kılıannyń Stıven Raıh mýzykasyna qoıǵan, qazirgi zaman baletiniń jaýharyna aınalǵan «Joldan taıǵandar» baleti kórsetiledi.
Álemniń úzdik sahnalarynda 30 jyldan asa ýaqyt qoıylyp júrgen bul týyndy – baletmeısterdiń «Qara jáne aq» atty baletiniń bir bólimi. Ony elordalyq teatrda daryndy horeograf Stefan Jeromskı sahnalaıdy. Akademııalyq baletten bólek, ózgeshe stılin qalyptastyrǵan tanymal cheh horeografynyń qoıylymy astanalyq teatrda alǵash ret usynylyp otyr.
− Irjı Kılıannyń shyǵarmashylyǵymen tanystyǵym naq osy týyndydan bastalyp edi. Bul baletti alǵash kórgenimde tóbem kókke jetkendeı erekshe kúı keshtim. Osy tektes dúnıe jasaýǵa bolady-aý degen, úsh uıyqtasam túsime kirmepti. Onyń baletinde bıleý − ár bıshiniń armany. Kóp uzamaı qazaqstandyq kórermenniń teatrymyzdyń daryndy ártisteriniń oryndaýynda osy spektakldi tamashalaı alatyny, shynymdy aıtsam, meni qýantady, − deıdi «Astana Balet» teatrynyń kórkemdik jetekshisi Nurlan Kanetov.
Irjı Kılıan horeografııasy men Stıven Raıhtyń aıryqsha kompozısııasynyń ásem úndestiginen segiz balerınanyń ǵajaıyp bıi paıda bolǵan. Al horeograftyń ózi: «Bul − bizdiń mamandyq týraly balet» deıdi. Bir aıtarlyǵy, bul týyndy − ǵajaıyp mýzykalyq áýezdigimen, monohromdyq estetıkasymen jáne bıdiń álemdik deńgeıimen erekshelenedi. Kılıannyń baleti – san túrli sezimderdiń bulqynysy ispetti: sezimtal ári tamasha bı plastıkasy ón boıyńyzdy baýrap áketedi.
Keshtiń ekinshi bóliminde kórermenge bekzat óner ordasynyń byltyrǵy erekshe premerasy – «Taǵdyr bultarystary» tartý etiledi. Balettiń mýzykasy men lıbrettosyn tanymal ánshi, Qazaqstannyń eńbek sińirgen qaıratkeri Karına Abdýllına jazǵan. Horeograf – Qazaqstannyń eńbek sińirgen qaıratkeri, «Astana Balet» teatrynyń bas baletmeısteri Mýkaram Avahrı.
Aıta keteıik, mádenı is-shara Mádenıet jáne sport mınıstrliginiń qoldaýymen ótedi.