Keshe О́zbekstan Prezıdenti Shavkat Mırzııoevtiń shaqyrýymen Túrkııa basshysy Rejep Taıyp Erdoǵan jubaıymen birge О́zbekstanǵa resmı saparmen keldi. Bul týraly Egemen.kz О́zbekstan Prezıdentiniń baspasóz qyzmetine silteme jasap habarlady.
Kýksaroı rezıdensııasynda Shavkat Mırzııoev pen Rejep Taıyp Erdoǵannyń shaǵyn quramdaǵy kelissózderi ótti.
Eki el basshylary ózara syılastyq, dostyq jáne senimge negizdelgen kóp qyrly ózbek-túrik yntymaqtastyǵyn odan ári damytý jóninde pikir almasty.
Kelissózder barysynda eki el arasyndaǵy strategııalyq áriptestik qatynastarynyń deńgeıin kóterý, saıası, parlamentaralyq, saýda-ekonomıkalyq jáne mádenı-gýmanıtarlyq baılanystardy tereńdetý máselelerine basty nazar aýdaryldy.
Shavkat Mırzııoev pen Rejep Taıyp Erdoǵan О́zbekstan men Túrkııa arasyndaǵy yntymaqtastyqtyń mańyzdy baǵyty birlesken jobalar men baǵdarlamalardy júzege asyrý arqyly saýda-ekonomıkalyq jáne ınvestısııalyq baılanystardy odan ári keńeıtý ekenin atap ótti.