Jas ǵalymdar jattandylyqty qalamaıdy

Ashyq áńgimede Almaty, Nur-Sultan, Atyraý, Túrkistan qalalaryndaǵy jetekshi joǵary oqý oryndarynyń ǵalymdary ózderiniń kókeıdegi saýaldaryn qoıyp, usynystaryn aıtty. Al olardyń usynys-pikirlerin Bilim jáne ǵylym vıse-mınıstri Qýa­nysh Erǵalıev, Ǵylym ko­mıteti tóraǵasynyń orynbasary Dýman Orynbekov, «Memlekettik ulttyq ǵylymı-tehnıkalyq saraptama ortalyǵy» AQ vıse-prezıdenti Danııar Tebaev tyńdap, jaýap berdi.

Is-sharany uıymdastyrýshy­lardyń biri ári moderatory, L.N.Gýmılev atyndaǵy EUÝ rekto­rynyń keńesshisi, RHD doktor Aqerke Abylaıhan ashyq dıalog qarapaıym chattaǵy qyzý talqy­laýdan bastalǵanyn jetkizdi.

–  «Bolashaq» qaýymdastyǵynda ár sala boıynsha klýbtar quryl­ǵan. Biz qurǵan bilim men ǵylym salasyna qatysty klýb músheleriniń basyn biriktirgen chatta qazir 600-den asa adam bar. Vıse-mınıstrdiń qatysýymen ótken osy ashyq áńgi­meniń ótýine «Bolashaq» baǵdar­lamasymen bilim alyp kelgen jas ǵalymdardyń sol ortaq chatta kóterilgen ózekti máseleleri túrtki boldy. Odan keıin biz jas zertteýshilerdiń qataryna osy L.N.Gýmılev atyndaǵy Eýra­zııa ulttyq ýnıversıtetiniń tájirı­besi mol ǵalymdary men oqytý­shylaryn qosyp, dıalog uıym­dastyrdyq. О́zim de «Bolashaqtyń» túlegimin, sheteldik júıe keıde bizge kelmeýi múmkin ekenine táji­rıbeden kóz jetken. Son­dyq­tan ony oıǵa, talqyǵa, sa­rapqa salyp baryp kórý kerek. Osyny eskerip, qos tarapty oı aıtatyn ǵalymdarǵa ortaq alań uıymdastyrýdy kózdedik. Júıe­li usynystar jınaqtalyp, mınıstrlikke joldanady, – dedi A.Abylaıhan.

Ashyq dıalogta ǵalymdardyń jobalaryn qarjylandyrý jaıy, jobany zertteý jáne ony bas­qarý, grant, halyqaralyq sarap­shylardyń pikirine táýel­dilik sekildi máseleler qara­lyp, ony sheshýdiń joldaryna qatys­ty usynystar aıtyldy. Usy­nys­tardy tyńdap, keregin ózine túrtip alyp otyrǵan mınıstrdiń joǵary bilim jáne ǵylym baǵyty boıynsha orynbasary Qýanysh Erǵalıev:

– Atalǵan chatta men de barmyn, jazylǵan pikirlerdi oqyp otyramyn. Búgingi kezdesý ekijaqty da tıimdi ári nátıjeli boldy. Elimiz táýelsizdik alǵaly beri respýblıkada 21 myńǵa jýyq ǵylymı joba júzege assa, barlyǵy memleket bıýd­jetinen qarjylandyrylyp, qoldaý tapty. Nátıjesinde, osyndaı jumystarmen aınalysatyn ǵylymı-zertteý ortalyqtary men túrli uıymdar ashylyp, álemdi moıyndatqan jobalar ómirge keldi, – dedi.

Jıyn sońynda Q.Erǵalıev aıtylǵan usynystardy jazbasha tapsyrýdy ótinip, yqylas bil­dirgen ǵalymdardy jeke qabyl­daıtynyn aıtty.