Kún saıyn jaryq dúnıege kádimgi sábılermen qatar, týmaı jatyp taǵdyr talqysyna dýshar bolǵan dimkás náresteler kelip jatady. О́kinishke qaraı, mundaı jaǵdaılar áke-sheshege de ońaı tımeıtindikten, olarǵa ómir boıy derlik qoldaý men kómek qajet. Erekshe kútimdi qajet etetin sábılerdi aıaǵynan turǵyzý, ómirge beıimdeý, mamandarǵa qaratý men taǵy basqasy tózimdilik pen ýaqytty ǵana emes, kóp qarajatty qajet etetini aıan.
Osy máselelermen 15 jyl boıy úzdiksiz aınalysyp kele jatqan AYALA qory jýyrda kezekti ret esep berdi. Qor osy jyldarda balalardyń ólim-jitimin azaıtý, jasóspirimderdi kásibı baǵdarlaý men erekshe bilim berý qajettiligi bar balalarǵa kómek kórsetý jobalaryna 5 mlrd teńgeden astam qarajat jumsaǵan. Qordyń balalar ólim-jitimi kórsetkishin tómendetýge qosqan úlesin Densaýlyq saqtaý mınıstrligi de atap ótip, «Tynys al, balaqaı» jáne «Basqarylatyn gıpotermııa» jobalaryna qatysty eki memorandýmǵa qol qoıǵan edi. 2021 jyldyń aqpanynan beri qor 100 shaqty neonatolog dárigerlerdiń biliktiligin arttyrǵan tegin onlaın-platformany iske qosý ıdeıasyn qoldady. Qysqasy, qor qurylǵaly beri 2,2 mlrd teńgeden astam qarajat qazaqstandyq densaýlyq saqtaý mekemelerinde balalardy qutqarý jáne kútip-baǵý jumystaryn jetildirýge baǵyttaldy.
Al 2007 jyldan bastap qaıyrymdylyqtyń úsh baǵytynda dáıekti jáne júıeli jumys isteýge kóshken AYALA qorynyń basty ustanymy – tıimdi qaıyrymdylyq. Demeýshilerdiń qarajaty men qazaqstandyqtardyń qaıyrymdylyq jarnalary bir jolǵy kómekke emes, jyldar boıy jumys isteıtin jobalarǵa jumsalady. Onyń nátıjesi – elimizde beti beri qaraǵan júz myńdaǵan balanyń ómiri. Oǵan qosa balalar úıleri men mektep-ınternattarynda túrli kásipterge beıimdelýden ótken júzdegen joǵary synyp oqýshylary bar. Munan bólek erekshe kútimdi qajet etetin myńdaǵan bala qor ornatqan jabdyqtarmen densaýlyqtaryn túzeýge árekettenedi.
2021 jyly qor iri demeýshiler men qazaqstandyqtardyń qaıyrymdylyq jarnasy túrinde 480 mln teńgeden astam qarajat tartsa, onyń 216 mln teńgesi Qazaqstannyń 12 perınataldyq ortalyǵynda 80 jańa medısınalyq tehnıka satyp alyp, ornatýǵa baǵyttaldy. Bul aldaǵy 5 jylda myńdaǵan náresteniń ómiri men aqyl-esterin damytýǵa septesedi.
«Bastapqyda bir rettik qarjy jınaý bizdiń jolymyz emes dep sheshtik. Dáriger retinde túsingenim, júıeli tásil ǵana naǵyz nátıjelerge jetkizedi. Sondyqtan bizdiń qor 15 jyl boıy balalar reanımasııasyna arnalǵan jabdyqtarmen jumys isteıdi jáne balalar dárigerleriniń – neonatologter, ortopedter, kardıohırýrgter men reanımatologterdiń biliktiligin arttyrýmen aınalysady. Jyl saıyn elimizdiń perınataldyq ortalyqtarynyń jansaqtaý bólimderinen myńdaǵan bala ótedi. Medısınalyq jabdyq birneshe jyl jumys isteıdi, oǵan qosa qor dárigerlerdiń jańa týǵan nárestelerdi kútip-baǵý bilimi men daǵdylaryn únemi jańartyp otyrady. Munyń nátıjesin árbir ata-ana kórip, barlyq demeýshiler men seriktesterimizdiń arqasynda aman-saý qalǵan balalaryn baýyryna basyp otyr», deıdi AYALA qorynyń prezıdenti Aıdan Súleımenova.
Qor aldaǵy jyldary balalar múgedektigin azaıtý úshin burynǵydan da belsendi bolýdy josparlap otyr.
«О́kinishke qaraı, Qazaqstanda múgedek balalar sany kóbeıip keledi. Sońǵy 5 jylda bul san eki esege artyp, 100 myńnan asyp ketti nemese shaǵyn qala halqynyń sanyna jetti. Balanyń ómirin saqtap qalý óte mańyzdy. Biraq odan da mańyzdysy ony fýnksıonaldy túrde saý qaldyrý. Sondyqtan birneshe jyldan beri balalar reanımasııasyn balalardyń múgedektigin azaıtýǵa kómektesetin qural-jabdyqtarmen jáne emdeý tehnologııalarymen qamtamasyz etip kelemiz», dedi Aıdan Súleımenova.
Al elimizdegi avtomatty gıpotermııa apparattary osylaı paıda bolǵan. 2017 jyldan beri olar qor oqytqan dárigerlerdiń qolymen 200-den astam balanyń ómiri men aqyl-esin saqtap qaldy. О́tken jyldan bastap qor retınopatııamen shala týǵan nárestelerdiń kórý qabiletin saqtaý isine belsene aralasyp keledi. Densaýlyq saqtaý mınıstrligimen birqatar kezdesý ótkizip, osy aýrýdy Dári-dármekpen emdeý jónindegi hattamany iske asyrýǵa qosyldy. Kózdiń toryn koagýlıasııalaýǵa arnalǵan 4 lazerlik qondyrǵy men eki oftalmoskop satyp aldy.
Sonymen qatar qor oftalmolog dárigerlerge tegin beıne kýrstar túsirýdi josparlap, 6 retınaldy kamera men 11 oftalmoskop satyp alý úshin demeýshilermen belsendi jumys júrgizip jatyr. Osynyń barlyǵy aldaǵy 3 jylda retınopatııasy bar jańa týǵan nárestelerde kórý qabileti boıynsha múgedektiktiń aıtarlyqtaı tómendeýine ákelýi tıis.
AYALA BQ óz jobalaryna demeýshilerden jınalǵan qarajattyń 100%-yn jáne quryltaıshylardyń qarajaty esebinen ákimshilik shyǵystardy qamtamasyz ete otyryp, jeke qaıyrymdylyq jarnalary arqyly jiberedi. Ashyqtyq pen tolyq esep berip otyrý da qordyń bedelin kótere alady. Iаǵnı Ayala.kz saıtynda 2007 jyldan bastap barlyq qarjylyq esepter jáne 2016 jyldan bastap KPMG teksergen barlyq aýdıtorlyq esepter bar. Bul qorǵa 15 jyl boıy elimizde tıimdi qaıyrymdylyqtyń joǵary standarttaryn ornatýǵa jáne qoldaýǵa múmkindik beredi.
«Qaıyrymdylyqtaǵy jumys tek jan-tánimen berilýdi jáne qaıtarymdy ǵana talap etpeıdi, jyl saıyn biz qordyń basty maqsattaryn anyqtaý úshin strategııalyq sessııa ótkizemiz. Sodan keıin árbir qyzmetkerdiń apta saıynǵy esebin tyńdap, jyldyq kelisilgen jospar boıynsha júremiz. Biz jańa ıdeıalarǵa ashyqpyz, súısinip oqımyz, kommýnıkasııada, jobalardy basqarýda, tipti satýda da óz daǵdylarymyzdy jetildiremiz. О́ıtkeni qor – bizdiń qazir jáne bolashaqta elimizdiń úzdik ÚEU qatarynda kórip otyrǵan kásibı uıym», deıdi Aıdan Súleımenova.
ALMATY