Qostanaı oblysynda myńnan astam oqýshy PISA halyqaralyq zertteý jobasyna qatysady. PISA – 15 jastaǵy oqýshylardyń akademııalyq jetistikterin baǵalaýdyń halyqaralyq baǵdarlamasy. Salystyrmaly túrde iske asyrylatyn zertteý jumystary 4 sáýirde bastaldy.
Jobany Ekonomıkalyq yntymaqtastyq jáne damý uıymy júrgizedi jáne oqýshylardyń jalpy bilim deńgeıin, matematıka jáne jaratylystaný pánderi boıynsha ǵylymı saýattylyq deńgeıin baǵalaıdy. Uıymdastyrýshylar saýaldamaǵa qatysatyn bilim mekemeleri men oqýshylar kezdeısoq irikteý ádisi arqyly tańdap almaq. Atalǵan joba 2000 jyldan beri ár 3 jyl saıyn júrgizilip keledi.
– PISA qazirgi oqý sapasy men oqýshylardyń mektepten alǵan bilimderin tájirıbede qoldana bilý qabiletin baǵalaıdy. Bilý – qazirgi fýnksıonaldyq saýattylyqtyń eń mańyzdy aspektileriniń biri. Osy ýaqyt ishinde zertteýge 15 jastaǵy 3 mln-nan astam stýdentter men oqýshylar qatysty. О́tken jyly pandemııaǵa baılanysty mundaı zertteý júrgizilgen joq. Al bıyl jobaǵa 80-ge jýyq el qatysady, – dedi oblystyq bilim basqarmasynyń baspasóz hatshysy Anna Lazareva.
PISA halyqaralyq zertteý jobasyna Qostanaı oblysyndaǵy 4 kolledj, 32 mektepte bilim alyp jatqan 1 030 oqýshy tańdalyp alynǵan. Oqýshylardyń bilim deńgeıi kompıýter formatynda test suraqtary men saýaldamaǵa jaýap berý arqyly tekseriledi. Bul joly balalardyń shyǵarmashylyq oılaý daǵdysy baǵalanbaq.
PISA nátıjeleri oqýshylardyń oqý úlgerimi boıynsha alǵan baǵalaryna áser etpeıdi, biraq salmaqty taldaý nysany retinde paıdalanylady.
Uıymdastyrýshylardyń aıtýynsha, mundaı zertteýler oqýshylardyń oqý daǵdysyn, matematıkalyq jáne ǵylymı saýattylyǵyn baǵalaýmen ǵana shektelmeıdi, sonymen qatar balalardyń oqýǵa degen ynta-yqylasynyń nendeı ýájge negizdeletinin qosa zerdeleıdi. Al zertteý barysynda alynǵan málimetter bilim berý salasyndaǵy kemshin túsip jatqan ózekti máselelerdi anyqtaýǵa, sondaı-aq bilim berý strategııasyn jetildirý boıynsha usynystar jasaýǵa kómektesedi.
Qostanaı oblysy