Elimizde taǵy bir joǵary oqý orny jabyldy. Bul – Atyraý ınjenerlik-gýmanıtarlyq ınstıtýty. Atalǵan oqý ornyn bas lısenzııadan aıyrý týraly sheshimdi Atyraý oblysynyń mamandandyrylǵan aýdanaralyq ákimshilik soty shyǵarǵan.
Bilim jáne ǵylym salasyndaǵy sapany qamtamasyz etý komıteti ýnıversıtet jumysyndaǵy kóptegen zań buzýshylyqty anyqtady. Atap aıtqanda, ınstıtýtta bilim berý uıymdary qyzmetiniń úlgilik erejeleri, memlekettik jalpyǵa mindetti standart talaptary, sondaı-aq biliktilik talaptary saqtalmaǵan.
Bilim jáne ǵylym salasyndaǵy sapany qamtamasyz etý komıtetiniń basqarma basshysy Elvıra Saparbekova: «Ýnıversıtetti tekserý barysynda kóptegen zań buzýshylyq anyqtaldy. Mysaly, oqytýshylardyń bir ýaqytta ártúrli tilde oqytatyn eki túrli topta sabaq ótkizý faktileri kezdesti. Biraq muǵalimderdiń oqý júktemesinde ár top boıynsha aýdıtorııalyq sabaqtar bólek eseptelgen. Odan bólek, oqý ornynda keıbir sabaqtar múldem ótkizilmegen. Bilim berý baǵdarlamalaryn ázirleý jáne bekitý kezinde zań buzýshylyqtarǵa jol berilgen. Sonymen birge Atyraý ınjenerlik-gýmanıtarlyq ınstıtýtynyń stýdentterdi oqytqan bilim berý baǵdarlamalary Bilim jáne ǵylym mınıstrliginiń tizilimine engizilgen baǵdarlamalarǵa sáıkes kelmedi. Nátıjesinde stýdentter oqý pánderin tolyq meńgermegen. Sondaı-aq oqý prosesi sapaly professorlyq-oqytýshylyq kadrmen qamtamasyz etilmegen», dedi.
Tekserý Atyraý ınjenerlik-gýmanıtarlyq ınstıtýtynda sapany qamtamasyz etýdiń ishki júıesi men qajetti materıaldyq-tehnıkalyq bazanyń joqtyǵyn kórsetti. Birqatar bilim berý baǵdarlamasy boıynsha oqý, ádistemelik jáne ǵylymı ádebıetter joq, ıaǵnı stýdentterdiń sapaly bilim alýyna jaǵdaı jasalmaǵan. Muny test tapsyrǵan stýdentterdiń bilim nátıjeleri rastady. Iаǵnı ınstıtýt stýdentteriniń 90 paıyzy shekti baldy jınaı almady.
Aıta keteıik, Úlgilik qaǵıdalardyń normalaryna sáıkes stýdentter ýnıversıtet lısenzııasynan aıyrylǵan sátten bastap oqýyn jalǵastyrý úshin basqa JOO-ǵa aýysýǵa quqyly.