Portýgalııanyń Maıa qalasynda Tennis Europe serııasy boıynsha jasóspirimder arasynda dástúrli halyqaralyq sýper týrnır márege jetti, dep habarlaıdy Egemen.kz Qazaqstan tennıs federasııasynyń baspasóz qyzmetine silteme jasap.
Elimizdiń jasóspirimder arasyndaǵy birinshi raketkasy, Eýropa reıtıngisiniń chempıondyq kestesinde kósh bastap kele jatqan Zańǵar Nurlanuly slovenııalyq Zıgo Sheshkomen birge juptyq synda fınalda germanııalyqtar Dıego Palomero – Nıls Makdonoldpen bas júldeni sarapqa saldy.
Úsh saǵatqa sozylǵan tartysty machta qazaqstandyq-slovenııalyq jup qarsylastaryna jol berdi – 6:1, 5:7, 5:10.
Almaty qalasynyń 13 jasar túlegi úshin bul juptyq syndaǵy altynshy fınaly edi, sonyń úsheýinde Zańǵar jeńiske jetti. Sonymen qatar ol jekeleı synda bes ret chempıon atanǵan bolatyn.
Endi Qazaqstannyń jas juldyzy 18 sáýirde Úndistanǵa attanady. Zańǵar Nurlanuly jasóspirimder arasynda álem chempıonatynyń irikteý saıysynda el namysyn qorǵaıdy.