Jylyoı aýdanynyń ortalyǵy – Qulsary qalasynda Qursaı ózegi bar. Jaǵalaýyna oryndyqtar qoıylyp, órnektas tóselgen. Alaıda ózektiń lastanýy úlkenderdi ǵana emes, mektep oqýshylaryn da alańdatyp otyr.
Sol sebepten, qulsarylyq 9-synyp oqýshysy Beksultan Qojabergen men 6-synypta oqıtyn Aqtilek Amanjol sý aıdynynan qoqys jınaıtyn robot qurastyrdy. Robottyń ataýy – Trashbot. Jańa tehnologııanyń tilin meńgerýge talpynǵan órenderge Qýanysh Shalabaev jetekshilik etetin robot tehnıkasy úıirmesine qatysqany septigin tıgizgen.
Talapty oqýshylar qoqys «jeıtin» robotty Qursaı ózeginde synaqtan ótkizdi. Jańa robotpen eki saǵatta 4-5 kılo qoqys jınaýǵa bolady. Sý aıdynyndaǵy túrli qoqysty jınaıtyn arnaıy qap robottyń ishine ornalastyrylǵan.
– Qorshaǵan ortanyń tazalyǵy úshin mundaı jobalardyń sanyn arttyrý qajet. О́ıtkeni bul eldiń ekonomıkasy men týrızmin damytýǵa oń yqpalyn tıgizýi múmkin. Jınalǵan qaldyqtardan kúndelikti qoldanylatyn qalam, qaryndash, plastıkalyq buıymdar shyǵarýǵa bolady, – deıdi Aqtilek Amanjol.
Atyraý oblysy