Almatyda 84 myńdaı jaramsyz aǵash bar

Aıtpaǵymyz, jasyl qala atanǵan Almatynyń atyn dúr­kiretken tal-terekterdiń basym bóligi qartaıdy. Buryn saıa bolǵan aǵashtardyń kópshili­giniń dińgegi shirip tur. Almaty qalalyq jasyl ekonomıka bas­qarmasy basshysynyń min­detin atqarýshy Serik Ádilbaev: «Almatydaǵy jasyl jelek qory –  2 809 183, onyń ishinde saýy –   1 946 234, kári aǵash – 360 309, jas óskinder – 418 012 jáne jaramsyz 84 628 aǵash bar», dedi.

Adam ómiri men múlkine qa­ýip tóndiretin, ózegi shirigen aǵash­­tar­dyń basym bóligi qala orta­ly­ǵynda. Kóshe boıynda – 34 962, aýla­larda 49 666 aǵash bar.

«Jyl saıyn aýdandyq ákim­dikterge 1,9 myń aǵash kesýge jáne onyń ornyna mindetti túrde 19 myń túp aǵash otyrǵyzý úshin 54 mln teńge bólinedi», deıdi spıker.

Qaladaǵy kári aǵashty kesý baǵ­darlamasy aıasynda ár kesilgen taldyń ornyna 10 kóshet­ten otyr­ǵyzylady. Bıyl jergilikti atqarýshy organdar «Jasyl Almaty» bastamasymen 1 mln aǵash otyr­ǵyzý aksııasyn aıaq­taı­dy. Buǵan deıin mega­po­lıste 705 myń kóshet otyr­ǵyzylǵan.

«Bıyl bizde 350 myń jasyl jelek otyrǵyzý jospary bar, onyń ishinde 72 346 kóshet otyrǵyzyldy. Jalpy, osy ekpeler esebinen 1 mln aǵash otyrǵyzý arqyly Jasyl Almaty aksııasyn aıaqtaýdy josparlap otyrmyz», dedi S.Ádilbaev.

Jasyl ekonomıka bas­qar­masynyń aldynda qalalyq eko­júıeni biriktiretin jáne bıo­ár­túrlilikti qoldaıtyn qa­la­nyń «jasyl jelisin» qurý­daǵy mańyzdy mindetter tur. Sondyqtan kúzde taǵy 277 654 jas kóshet otyrǵyzý josparlanyp otyr.

«Aǵash otyrǵyzǵan kezde den­drolog ǵalymdardyń aqyl-keńesteri eskerildi. Olar ká­dimgi qaraǵaı, qazaqstandyq terek, usaq japyraqty qaraǵaı, qaıyń, shaǵan, akasııa, súıir japyraqty úıeńki, kashtan, robınııa, kópirshik, dolana, alma, órik otyrǵyzýdy usynady», dedi basqarma basshysynyń mindetin atqarýshy.

Spıker almatylyqtarǵa kó­shetterdi tegin taratý «Jasyl aýla» aksııasyna ulasatynyn, kúzde megapolıs turǵyndaryna 2 myńǵa jýyq kóshet taratý jos­parlanyp otyrǵanyn jetkizdi. Sondaı-aq qalany gúl kompozısııalarymen jáne gúlzarlarmen bezendirý jumysymen aınalysyp otyrǵan mekemeler bar.

«Birjyldyq jáne kóp­jyl­dyq gúlzarlardy otyr­ǵyzý 2023 jylǵa deıin jal­ǵasady. Jalpy somasy 2,1 mlrd teńgege merdigerlik uıymdarmen 10 shart jasaldy. Gúl otyrǵyzý sáýir aıynda bastaldy, óıtkeni bul eń qolaıly kezeń. Sándik gúlder egiletin jerlerdiń jalpy kólemi shamamen 159 myń sharshy metrdi quraıdy», dedi spıker.

Budan basqa ótken jyldar­dyń kópjyldyqtaryna kútim jasaý, sondaı-aq 26 myń sharshy metr alańǵa kógal egý jos­parlanǵan. Aıtqandaı, Almatyda bulbul gúlder paıda bolady. Kolambýs, abba, dınastı, strong gold, lalıbella, lıap top sııaqty gúlderdi otyrǵyzý 10 mamyrǵa deıin jalǵasady. Megapolıstegi aǵashtardy sanıtarlyq kesý maýsymdyq is-sharasy bir ja­ǵynan qýraǵan aǵashtardan arylý arqyly turǵyndardyń ómirine qaýipsiz bolsa, ekinshiden, aǵashtardy saýyqtyryp, buta­laryn jańartyp, ártúrli ósimdik aýrýlarynyń paıda bolýyn azaıtatyny belgili. Bıyl osy maqsatta aýdandyq ákimdikterge 1,9 myń aǵashty kesip, ornyna 19 myń ótemdik aǵash otyrǵyzýǵa 54 mln teńge bólindi.

«Biz aǵashtardyń basyn sanı­tarlyq kesýmen jasartyp, pishindeıtin jumystardy júzege asyramyz. Jyl saıyn aýdandyq ákimdikter 61 myń aǵashty kesedi», dedi S.Ádilbaev.

Bıyl 242 aǵashtyń dińi qulap, iri butaqtary mort synǵan. Quzyrly mekeme kók­temdegi daýylda 185 aǵash qulap, iri 57 butaq opyrylyp túskenin málimdedi. Al qaýipti aǵashtardy kesý jumystaryn aýdannyń kom­mýnaldyq qyzmetteri men Almaty qalasynyń qutqa­rý qyzmeti atqarýǵa tıis. Aǵash­tar­dy kesýge ruqsat alý úshin bel­­gilengen tártippen qujat­tar­dy elektrondyq nysanda E-gov (e-license – qorshaǵan ortany qorǵaý – aǵashtardy kesýge ruqsat berý – qyzmetke onlaın tapsyrys berý) elektrondyq úkimeti arqyly jiberý qajet. S.Ádilbaev qulaǵan aǵashtar kel­tirgen shyǵyndy óteý jóninde aıta kele, múlikke zaqym kelgen jaǵdaıda irgeles aýmaqtyń ıesi 5 metr shekarada jaýapty ekenin atap ótti. Jalpy paıda­lanylatyn jerlerde jaýap­kershilik osy ýchaskege qyz­met kórsetetin kógaldandyrý jó­nindegi uıymdarǵa (aýdan ákim­digi) bekitilgen. Sondaı-aq ol shyǵyndy óteýdi qaraý prosesi jeke sıpatqa ıe ekenin jáne ádet­te sot arqyly qaralatynyn aıt­ty.

Senbilikterde almatylyqtar úıme-úıme qoqys jınap jatyr. Tek 9 sáýirde qala turǵyndary kommýnaldyq qyzmettermen birge 10 910 tekshe metr qoqys jınap, shyǵardy. Jasyl ekonomıka basqarmasy jınalǵan qoqysty, japyraqtardy órte­meý keregin aıtady. Kez kelgen jer­de jınalǵan qoqysqa ot qoıý qaýipti. Onyń ústine, «Alma­ty qalasynyń jasyl jelek­terin kútip ustaý jáne qor­ǵaý ere­jelerine» sáıkes buǵan úzildi-kesildi tyıym salynady.