Jyl basynan beri qazaqstandyqtarǵa 704,9 mlrd teńgeden astam somaǵa zeınetaqy tólendi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady, dep jazady Egemen.kz.
«1 naýryzdaǵy jaǵdaı boıynsha qazaqstandyqtarǵa 704,9 mlrd teńgeden astam somaǵa zeınetaqy tólendi. 2022 jylǵy naýryzda respýblıkalyq bıýdjetten zeınetaqy tólemderine 234,8 mlrd teńgeden astam, onyń ishinde bazalyq zeınetaqyny tóleýge – 71,4 mlrd teńge, yntymaqty zeınetaqyny tóleýge – 163,4 mlrd teńge baǵyttaldy», delingen vedomstvo habarlamasynda.
Mınıstrlikte naqtylaǵandaı, 2022 jylǵy 1 sáýirdegi jaǵdaı boıynsha zeınetkerler sany 2 mln 245,6 myń adamdy qurady.
«2022 jylǵy 1 sáýirdegi jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) 105 344 teńgege jetti», dep qosty QR EHÁQM baspasóz qyzmeti.