Jyl saıynǵy qalyptasqan dástúr boıynsha bıylǵy jyldyń 7 sáýiri men 7 mamyry aralyǵynda Astana qalasynyń aýmaǵyn sanıtarlyq tazalaý, abattandyrý jáne kógaldandyrý maqsatynda kóktemgi ekologııalyq aılyǵyn ótkizý josparlanýda. 19 sáýirde «Biz – taza qalada turamyz!» atty uranmen jalpyqalalyq senbilik ótedi.
Senbilikke shamamen 100 myńnan astam astanalyq qatysady dep kútilýde. Ekologııalyq aılyq kúnderinde qala aýmaǵyn sanıtarlyq tazalyqtan ótkizý kóshelerdi, jaıaý júrginshiler joldaryn, aýlalar men gúlzarlardy tazalaý jáne abattandyrý jumystary júrgiziletin bolady. Esil, Aqbulaq jáne Sarybulaq ózenderiniń arnalaryn kúl-qoqystan, turmystyq qaldyqtardan tazalaý, aryqtardaǵy káriz júıesin tazartý jumystaryn júrgizý kózdelýde.
Sonymen qatar, gúlzar men baqtardaǵy jasyl kóshetterdi kútýde maýsymdyq agrotehnıkalyq jumystar, kógaldar men gúlzarlar aýmaǵyn túzeý sharalary júzege asyrylady. Qala ortalyǵyndaǵy alańdardy, balalar oınaıtyn aýlalardy qystan qalǵan japyraq shirindilerinen tazartý jáne kógaldardy qunarlandyrý sharalary atqarylady.
Joǵaryda atap ótkenimizdeı, 19 sáýirde dástúrli jalpyqalalyq senbilik ótedi. Oǵan 8500 kásioryn men uıymdar, 170 oqý oryndary, qaladaǵy 360 páter ıeleriniń kooperatıvteri jumyldyrylyp, 93 myńnan astam adam jáne 450 tehnıka qatysady. Astana qalasy ákimi apparatynyń baspasóz qyzmeti habarlaǵandaı, qalalyq Tabıǵı resýrstar men tabıǵat paıdalanýdy retteý basqarmasy bıylǵy senbilikte 2700 aǵash jáne kóshet otyrǵyzýdy josparlap otyr. «Almaty» aýdanynda – 1000 aǵash (Qaldaıaqov jáne 46 kóshelerinde), «Esil» aýdanynda – 1 500 aǵash (Jánibek jáne Kereı han, Turan dańǵyly men Eńbekshiler kóshesine deıin), «Saryarqa» aýdanynda – 200 kóshet (Tilendıev kóshesinde) otyrǵyzylmaq. Qala ákimdigi barlyq astanalyqtardy týǵan qalamyzdy gúldendirý maqsatyndaǵy sanıtarlyq tazalyq aılyǵyna qatysyp, senbilik kúnderi bir kisideı uıymshyldyq kórsetýge shaqyrady.
Jylqybaı JAǴYPARULY,
«Egemen Qazaqstan».