Oral qalasynda birneshe aılap jalaqylaryn alýǵa zar bolyp júrgen zaýyt qyzmetkerleri ádildik izdep sotqa júgingen edi.
Sot tıisti sheshim shyǵarǵan bolatyn. Biraq, shekten shyqqan «Sýdoremontnyı zavod» JShS-niń basshylyǵy álgi sot sheshimin oryndaýdan bas tartty. Tipti sot oryndaýshysynyń boryshkerge sot sheshimin óz erkimen oryndaý jónindegi birneshe ret joldaǵan eskertý habarlamasyna da qulaq aspady. Osylaısha «Sýdoremontnyı zavod» JShS-niń basshylyǵy júgensiz ketti.
Sodan amal joq, sot oryndaýshysy «Atqarýshylyq is júrgizý jáne sot oryndaýshylarynyń mártebesi týraly» zańynyń talaptaryna sáıkes boryshkerdiń esep shottaryna ınkassalyq ókim qoıyp, jyljymaıtyn múlikterine tyıym saldy. Sóıtip edi, lezde álgi zaýyt basshylyǵy uıqylarynan oıanǵandaı boldy. Artynsha qarapaıym eńbek adamdarynyń talap-tilegi de oryndaldy. Sot oryndaýshysynyń dármeni arqasynda boryshker kásiporynnan 3 018 808 teńge tolyǵymen óndirilip alyndy. Endi qazirgi ýaqytta zańǵa sáıkes jaýapker mekemeden memleket paıdasyna atqarýshylyq sanksııa óndirý týraly áreket te qarastyrylýda.
Fatıholla MAShTAHOV,
Batys Qazaqstan oblysy Sot aktilerin oryndaý departamentiniń baspasóz hatshysy.