Aqmola oblysynda ishki ister departamentiniń Bagıra esimdi ıti kezekti qylmysty ashýǵa tikeleı kómek kórsetti.
Oblystyq ishki ister departamenti baspasóz qyzmetiniń deregi boıynsha, 7 sáýir kúni Sandyqtaý aýdandyq polısııasynyń kezekshi bólimine Qyzyl Qazaqstan aýylynyń 25 jasar turǵyny jergilikti ZTJMO ǵımaratynda belgisiz bireýlerdiń sómkesinen aqsha urlap ketkeni týraly shaǵym túsirgen. Al urlanǵan aqshanyń kólemi 70 myń teńge bolyp shyqty.
Dabyl negizinde oqıǵa ornyna jedel jetken polısııa qyzmetkerleri iske shuǵyl kiristi. Olardyń qataryndaǵy jyldam tergeý júrgizý tobynyń ınspektor-kınology starshına Ivan Mıshenko izdeýge Bagıra esimdi ıtin qosyp jiberedi. Al iz keskish ıtke kúdiktini tabýǵa birneshe mınýt kerek bolǵan. Ol urlyq jasaǵany ańǵarylǵan Týchnoe aýylynyń 43 jastaǵy turǵynyn ustady.
Rýslan IGILIK.