Tokıo Olımpıadasynyń qola júldegeri Zýlfııa Chınshallo Qyzylorda qalasynda erler men áıelder arasynda ótip jatqan el chempıonatynda tórt rekordty jańartty, dep habarlaıdy Egemen.kz.
Qazaqstan aýyr atletıka federasııasy málim etkenindeı, Zýlfııa 59 kelige deıingi salmaqta úzdik shyqty. Ol qossaıys qorytyndysynda 223 kelini (95+128) kóterdi. Ekinshi orynǵa ıe bolǵan qarsylasyn 51 kelige artqa qaldyrǵan Z.Chınshallo Qazaqstannyń tórt rekordyna (julqa kóterýden eki, serpe kóterýden bir jáne qossaıys qorytyndysynda) qol jetkizdi.
Sonymen qatar qazaqstandyq aýyr atletke Ashhabad qalasynda 2018 jyly ótken álem chempıonatynyń qola júldesi de tabys etildi. Bul birinshilikte Zýlfııa besinshi orynǵa taban tiregen edi. Áıtse de onyń aldyndaǵy eki sportshynyń nátıjeleri joqqa shyǵarylǵandyqtan, Z.Chınshanlo úzdik úshtikke ilikken edi.
Z.Chınshallo el birinshiligine tyńǵylyqty daıyndalǵanyn, sondaı-aq álem chempıonatynyń júldesin alǵanyna qýanyshty ekendigin, budan bylaı da tynbaı eńbektene beretinin jetkizdi.
Zýlfııa Chınshanlony osynaý tabysymen Ilıa Ilın Instagramdaǵy paraqshasynda quttyqtady.
«Búgin Zýlfııa Chınshanlo serpe kóterýden 128 kg olımpıada rekordyna qol jetkizdi. Jalpy nátıje – 223 kg jáne álemdik reıtıngte 1-orynǵa kóteriledi. Saǵan ózińniń besinshi olımpıadańa baryp, altyn alýyńa tilektespin», dep jazdy I.Ilın.