Maǵzum Myrzaǵalıev Qasym-Jomart Toqaevqa ulttyq kompanııanyń qazirgi jumystary, qarjylyq jaǵdaıy men aldaǵy kezeńdegi damý perspektıvalary týraly esep berdi, dep habarlaıdy Egemen.kz Aqordaǵa silteme jasap.
Kezdesý barysynda Kaspıı qubyr jelisi konsorsıýmyna qatysty ahýalǵa erekshe nazar aýdaryldy. Prezıdentke aılaqtyń jyljymaly qurylǵylar júıesin jóndeý jumystarynyń jýyrda aıaqtalatyny jóninde baıandaldy. Bul Qazaqstan munaıyn Kaspıı qubyr jelisi konsorsıýmy arqyly tasymaldaýdyń burynǵy kólemin qalpyna keltirýge múmkindik beredi.
Sonymen qatar Qasym-Jomart Toqaevqa Atyraý oblysyndaǵy polıpropılen shyǵaratyn keshen qurylysynyń barysy týraly málimet berildi. Maǵzum Myrzaǵalıevtiń aıtýynsha, atalǵan zaýyttyń qurylysyn jýyq arada aıaqtaý josparlanyp otyr. Bul munaı-gaz hımııasynyń ónimi boıynsha Qazaqstannyń netto-eksporterge aınalýyna múmkindik beredi.
Memleket basshysy elimizdiń munaı-gaz hımııasy salasyn damytýdyń asa mańyzdy ekenin aıtty.