Elordadaǵy Ilııas Jansúgirov atyndaǵy №58 mektep-gımnazııasy men «Astana daryny» daryndylyqty damytý jáne psıhologııalyq súıemeldeý ortalyǵy birlesip, bas qaladaǵy jalpy bilim beretin mektepterdiń 7-11-synyp oqýshylary arasynda alǵash ret respýblıkalyq deńgeıde ótetin Ilııas Jansúgirov oqýlarynyń qalalyq irikteý kezeńin ótkizdi.
Mazmundy is-sharanyń maqsaty – mektep oqýshylary arasynda aqyn shyǵarmalaryn nasıhattaý, jetkinshekterdiń ádebı kórkem shyǵarmaǵa qushtarlyǵyn arttyryp, estetıkalyq talǵamyn qalyptastyrý.
Qazaq poezııasynyń alybyna arnalǵan is-sharanyń ashylýynda «Astana daryny» ortalyǵynyń bólim meńgerýshisi Quralaı Baıahmetova sóz alyp, aqyn oqýlarynyń mańyzyna toqtalyp, baıqaýǵa kelgen oqýshylarǵa sát-sapar tiledi.
Qalalyq irikteý kezeńine bas shahardaǵy 48 mektepten, 95 oqýshy qatysýǵa ótinish bergen. Baıqaý úsh atalymnan turdy.
Birinshi «Ilııas – epık aqyn» atty atalymǵa 20 oqýshyǵa qatysyp, aqyn poemalaryn jatqa oqysa, solardyń arasynan №80 mektep- gımnazııasynyń 9-synyp oqýshysy Aqerke Kazımova top jardy. Ekinshi «Sulý sózdiń súleıi» atalymynda 35 oqýshy syrshyl sýretkerdiń óleńderin, prozalyq, dramalyq shyǵarmalaryn mánerlep oqýdan synǵa túsip, sonyń ishinen №58 mektep-gımnazııasynyń 8-synyp oqýshysy Nuraı Saparbek aqynnyń 48 óleńin múdirmeı jatqa oqyp, birinshi oryndy ıelendi. Úshinshi «Aǵyndy meniń – Aqsýym» atty jas aqyndar músháırasy atalymynda №86 mektep-gımnazııasynyń 11-synyp oqýshysy Asyljan Ártelbektiń baǵy jandy.
Endi atalǵan úsh jeńimpaz Taldyqorǵan qalasynda ótetin Ilııas Jansúgirov oqýlarynyń respýblıkalyq baıqaýyna qatysady.
Aıta keteıik, №58 mektep-gımnazııasyna Ilııas atamyzdyń esimi berilgendikten endi jyl saıyn aqyn oqýlary osy bilim ordasynda ótedi. Sondaı-aq jaqynda atalǵan mektepte qalamger urpaqtarynyń qatysýymen Ilııas Jansúgirov ortalyǵy ashylady.