Bıyl áleýmettik jelilerdegi zańǵa qaıshy 36 484 materıal buǵattaldy. Bul jaıynda Senat depýtattarynyń saýalyna berilgen Premer-Mınıstrdiń orynbasary Eraly Toǵjanovtyń jaýabynda aıtylǵan, dep habarlaıdy Egemen.kz.
«Aqparat jáne qoǵamdyq damý mınıstrligi ǵalamtorda qoljetimdi resýrstar men áleýmettik jelilerdi táýlik boıy qadaǵalaıdy. Zańnamany buzý faktileri anyqtalǵan jaǵdaıda ınternet resýrstyń ákimshiligine eskertýler men habarlamalar joldanady. Eskertýler túzetilmegen bolsa, ınternet-resýrs sot sheshimimen zańnamada belgilengen tártippen buǵattalady. Jarııalanǵan materıaldarda qylmystyq is-árekettiń belgileri anyqtalsa, olardyń avtorlary men taratýshylary qylmystyń jaýapkershilikke tartylady», delingen E.Toǵjanovtyń jaýabynda.
Onyń atap ótýinshe, zańǵa qaıshy kontenttiń taralýyna jol bermeý maqsatynda ýákiletti organdar VKontakte, Odnoklassnıkı, Mail.ru, Livejournal, Facebook, Instagram áleýmettik jelileriniń ákimshiligimen tyǵyz yntymaqtastyq ornatqan.
«2022 jyly Aqparat jáne qoǵamdyq damý mınıstrligi júrgizgen monıtorıngtiń nátıjesinde 36 484 zańǵa qaıshy materıal buǵattaldy», dedi vıse-premer.
Úkimet basshysy usynǵan derekke sáıkes, atalǵan materıaldardyń 35 myńnan astamy - terrorızm, dinı jáne etnıkalyq ekstremızm ıdeologııasyn taratý, 332-si – esirtki quraldaryn nasıhattaý jáne taratýǵa, 3 531-i – pornografııany, qatygezdik pen sýısıdti nasıhattaýǵa, 32-si – ar-namysqa til tıgizý, bılikti qorlaýǵa, 111-ge jýyǵy - jalǵan aqparat taratýǵa qatysty boldy.