Úkimet basshysy qazaqstandyqtardy Jeńis kúnimen quttyqtady, dep habarlaıdy Egemen.kz Úkimettiń resmı saıtyna silteme jasap.
Qurmetti ardagerler men tyl eńbekkerleri, otandastar!
70 mıllıonnan asa adamnyń ómirin qıǵan adamzat tarıhyndaǵy eń qasiretti soǵys aıaqtalǵaly 77 jyl. Kún ótken saıyn bul qandy maıdanǵa qatysyp, surapyl jyldardyń kýási bolǵandar qatary sırep barady. Búginde Uly Otan soǵysynyń 376 ardageri aramyzda júr. Men ótken jumada Petropavl qalasynda boldym. Munda aramyzda qalǵan az ǵana ardagerdiń biri Valentına Volkodav turady. Jaqynda 100-ge toldy. Jeńis degen sózdi eń kóp kútken býynnyń ókili. Valentına Arhıpovnaǵa arnaıy sálem berip, Jeńis merekesimen quttyqtap shyqtym.
Valentına Arhıpovnanyń óz zamandastarynan alabóten taǵdyry joq. Qazaqstannan maıdanǵa attanǵan mıllıondaǵan sarbazben birge ol da qolǵa qarý aldy, sapqa turdy, jaýǵa umtyldy. Ot pen oqtyń ortasynda júrip, san surapyldan aman shyqty, Jeńis kúnin Berlınde qarsy aldy. Qatary sıregen qarýlastarymen birge elge oralyp, eńbekke aralasty, taǵdyrlastary qatarly otaý qurdy, bala súıdi.
Alaıda mundaı baqyt barlyq maıdangerge buıyrǵan joq. Qanshama bozdaq maıdan dalasynda qaldy. Qanshama úı qara qaǵaz alyp, qara jamyldy. Oryndalmaǵan armandar, buzylǵan josparlar, talqandalǵan taǵdyrlar, kóterilmeı qalǵan shańyraqtar, balasynan aıyrylǵan ata-analar, jetim qalǵan balalar... Soǵystyń anyqtamasy óte kóp.
Ǵasyr jasaǵan Valentına Arhıpovna soǵystyń ǵana emes, talaı uly ózgeristerdiń kýási boldy. Soǵystan sońǵy aýyr kezeńderde bel sheshpeı, tize búkpeı eńbek etti, Qazaqstannyń Táýelsizdik alǵanyn kórip, egemen elmen birge jańa ómirge umtyldy. Qazir beıbit zamanda, adam tanyǵysyz ózgergen álemde bala-shaǵasynyń ortasynda kún keship jatqan baqytty ana ońashada: «Bizdiń balalarymyz endi bir ǵasyrdan keıin qandaı álemde ómir súrer eken? Qandaı uly jetistikterge qol jetkizer eken?» dep oılamaıdy deısiz be?!
Keler urpaqtyń kórer jaqsylyǵy men tartar azaby búgingi biz qabyldaıtyn sheshimderge, dáripteıtin qundylyqtarǵa baılanysty bolmaq. Sondyqtan 9 mamyr – Uly Otan soǵysynyń adamzatqa ákelgen zardabyn eske alyp, bozdaqtarymyzdyń maıdanda tógilgen qany men ata-ájelerimizdiń tylda tógilgen mańdaı teriniń aldynda bas ıetin qadirli kún!
Táýelsizdigimiz baıandy, elimiz tynysh bolsyn! Eń basty jeńis – sol!
Aıana Toǵanbek