Qazirgi kezde álemniń birqatar memleketinde sporttyń san túrinen asa iri halyqaralyq jarystar ótýde. Sol saıystarda Qazaqstannyń órenderi de óner kórsetýde.
Brazılııanyń Kashıas-dý-Sýl qalasynda ótip jatqan Sýrdlımpıada oıyndarynda qazaqstandyq jeńil atlet Olga Hıjnıakova óz jankúıerlerin taǵy bir qýantty. Seısenbi kúni ǵana ıadro laqtyrýdan kúmis medaldi ıelengen ol keshe balǵa laqtyrýshylardyń básekesine qatysty. Bul joly da Olga qalyń toptyń arasynda qalyp qoımaı, úshinshi orynǵa taban tiredi. Sóıtip, jalǵyz Hıjnıakovanyń ózi Brazılııa kóginde qazaqtyń Kók baıraǵyn eki márte jelbiretti.
Iraktyń Sýleımanı qalasynda sadaq atýdan Azııa kýbogynyń kezeńdik saıysy óz máresine jaqyndap keledi. Keshe komandalyq básekede áıelder quramasy (Vıktorııa Lıan, Elmıra Raısova jáne Ádel Jeksenbaeva) kúmis medaldi ıelense, erler (Sergeı Hrıstıch, Býnıod Myrzametov, Shámil Sagýtdınov) qolaǵa qol sozdy. Al aralas juptar jarysynda (Sergeı Hrıstıch pen Ádel Jeksenbaeva) jerlesterimiz kúmispen kúpteldi.